“Kapļi” pīduovoj dzīsmi vuocu volūdā
Piec aktivys koncertdarbeibys vosorā, projekts “Kapļi” nūlēme īraksteit dzīsmi svešvolūdā. Diskuseju rezultatā tyka nūlamts, ka grupa paliks alternativa ari svešvolūdys izvielē – pīrostuos angļu volūdys vītā tyka izvālāta vuocu, golu golā – vuocu kulturys ītekme iz Latveju bejuse daudz leluoka nakai angļu.
Projekts “Kapļi” puorstuov Latvejis underground muzyku. Papyldus tam, ka dzīšmu teksti ir latgaliski (latgaliski dzīduot a priori nūzeimoj dorbuotīs alternativi), ari grupys solists ar sovu bolsu vaira na dzīd, nu pīdar pi “Solistu Runuotuoju” kastys. Tok grupa vēļ ari nasakautrej radeit sadzeiviski i sociali aktualus tekstus, naratai tymūs balansejūt iz rupjeibu rūbeža, nu nikod tū napuorkuopūt.
Grupys sastuovs ir tikpat alternativs, cik izpyldamuo muzyka. Basgitarists Jurs ir tuolbrauciejs, saksofonists Juoņs – rūbežsorgs, tausteņneica Rasma – muzykys školuotuoja, saksofoniste Aija – vydsškoļneica, gitarists Arņs puorstuov cytu Latgolys grupu – “Dabasu Durovys”, solists/runuotuojs Oskars ir rakstnīks, nu bundzinīks Andris ir psihologs.
Rodūt muzyku, grupa rauga uzrunuot vysaidu socialūs sluoņu klauseituojus, suocūt nu Kombuļu pensionarim, beidzūt ar aristokratiskim švītim.
Dzīsmis īraksts radeits Jura Lynuža piertī.
Miksēja Armands Treilihs.
Muzyka: Arņs Slobožaņins/Oskars Orlovs
Vuordi: Oskars Orlovs, Laura Bicāne, Jurs Lynužs, Arņs Slobožaņins
Aranžēja: Rasma Kulamova, Arņs Slobožaņins
Komentari