5. decembrī Latgolys viestnīceibā GORS nūtiks izcyluo, pasaulī atzeituo latvīšu pianista Reiņa Zariņa solo koncerts. R. Zariņa koncerts ir vīneigais pianista solo koncerts Latvejā ituo goda ūtrajā pusē, nu uzastuošona Rēzeknē byus Zariņa ūtruo gasteišonys reize Latgolys viestnīceibā GORS.

Pianists klauseituojim pīduovuos koncertprogramu “1Schubert | 12dances”, kurys pyrmajā daļā izskanēs apjūmeiga i samārā personiski intima Šūberta sonāte, kū komponists sarakstejs sovys dzeivis pādejūs godūs, nu solo koncerta ūtrajā daļā byus klausamys dažaidu kulturu dejis, kurys pamatā 20. gs. sarakstejuši komponisti Šostakovičs, Stravinskis, Smetana, Čaikovskis, Ravēls, Džinasters i cyti. Latvejis Radejis 3. programys “Klasika” intervejā Reinis Zariņš par koncertu stuosta: “Koncerta ūtruo daļa byus kai deju kolekceja, kurys programu asu viereigi izplānuojs, īkļaunūt i slāvu kulturys, i latīņamerikaņu kulturys, i džeziskuokys dejis, i nūslādzūt tū vysu ar pamateiguoku skaņdorbu, kas krūnej koncertprogramu – Ravēla valsi klavīru versejā. Valsis ir mežūneigi gryuts, nu lela bauda tū spielēt!” Pianists cer, ka pyrmuos dalis nūpītnais skaņdorbs i ūtruos dalis daudzi vīglī radeis aizraujūši klausamu koncertu.

Reidzinīks Reinis Zariņš klavīrspēlis studejis suoce septeņu godu vacumā, nu jau desmit godu vacumā debitēja kai solists ar orkestri. Pianists ar izcileibu absolviejs Jāzepa Mediņa, Emīla Dārziņa, Jēlys Universitatis muzykys školys, kai ari Londonys Karaliskū Muzykys akademeju. Reinis Zariņš sovu školuotuoju vydā izceļ Borisu Bermanu, Kristoferu Eltonu, Rafi Haradžanjanu i Renē Salaku.

Pianists aktivi koncertej Eiropā, ASV i naseņ ari Dīnvydafrikā. 2011. godā Reinis Zariņš sajēme Lelū Muzykys bolvu par izcilu interpretaceju, i da šam paspiejs plyukt laurus 11 storptautiskūs pianistu konkursūs. Pianists ir izdevs treis augstu nūvārtātus diskus – studejis albumus Circus&Magic i “Jāzeps Vītols – Works for solo piano”, kai ari koncerta īrokstu nu Londonys Vigmora zala.

Reiņa Zariņa spieja puorlīcynūši interpretēt i klasiķus, i pādejuo godu symta dorbus sajiusmynuojuse klauseituojus daudzvīt, ari pasauļa prestižuokajūs koncertzalūs – Amsterdamys Concertgebouw, Ņujorkys Kārnegija i Steinveja zalūs, kai ari Londonys Vigmora zalā.

Īīšonys kartis iz pianista solo koncertu nūpierkamys Latgolys viestnīceibys GORS i “Biļešu Paradīzes” kasēs. Īīšonys kartis cena 7,00 €.

Karteņa: Andris Sproģis