Rēzeknis Vaļsts gimnazejā jau 16 godu aktivi dorbojās tautys deju kolektivs “Vadži”, kurā 10.-12.klašu školāni veiksmeigi apvīnoj muokslinīciskū jaunradi ar uzastuošonys prīcu, doncuotprasmi ar sasnāgumim deju skatēs i pīsadaleišonu Vyspuorejūs Latvejis dzīšmu i deju svātkūs. Kolektivs pa itū laiku ir aktivi uzastuojs školys, piļsātys i vaļsts mārūga kulturys pasuokumūs, vairuokkuort ir pīsadalejs koncertūs Eiropā, VIII, IX, X Latvejis školu jaunatnis dzīšmu i deju svātkūs, kai ari XXV Vyspuorejūs Latvīšu dzīšmu i XV Deju svātkūs. Jaunīši cīši aktivi gryb doncuot i ari tuoļuok pīsadaleit koncertūs i pasuokumūs, kai ari itūšaļt ar pylnu atdevi gatavejās skatei, kab varātu pīsadaleit XI Latvejis školu jaunatnis dzīšmu i deju svātkūs 2015. goda vosorā.

Itūs godu laikā tautys tārpi ir nūlītuoti i datryukst dažaidu tautys tārpu elementu. Da šam bīži ir daguojs aizajimt abavi i tautys tārpu sastuovdalis, partū itūšaļt grybam pylnvierteigi atjaunuot kolektiva tautys tārpus, tai ceļūt doncuotuoju pošapziņu; veidojūt izpratni par Latvejis kulturys vierteibu i tradiceju saglobuošonu, kūpšonu i atteisteibu i pošu svareiguokū – saglobuot jaunīšūs doncuotprīcu.

Ituos šaļts finansialuos vareibys nav tik spūdrys, kab pošu spākim varātu atjaunuot tautys deju kolektiva doncuotuoju tārpus, abavi, koč i jaunī doncuotuoji sapynoj par vareibu 2015. goda vosorā pīsadaleit školu jaunatnis deju svātkūs Reigā, skatēs, koncertūs, partū ir rodusēs vareiba pīsadaleit lobdareibys iniciativu projektā “Labiedarbi.lv” ar dasaceitū projektu “Riti raiti, deju soli”.

Partū sevkuram, kurs gryb atbaļsteit Rēzeknis Vaļsts gimnāzejis jaunīšu tautys deju kolektiva “Vadži” lobdareibys iniciativu, ir vareiba nūbolsuot portalā www.labiedarbi.lv par projektu “Riti raiti, deju soli”. Bez moksys nūbolsuot par projektu var ite, portalā inbox.lv  i draugiem.lv.

Rēzeknis Vaļsts gimnāzejis jaunīšu tautys deju kolektivs “Vadži”