Decembrī ir nūsasliedzs Latgolys Kulturviesturis muzeja projekts “Latgolys keramikys kolekcejis saglobuošona. Vacmeistaru dorbu restauraceja. 2. kuorta”, tuo ītvorūs nu ituo gods maja ir restaurāti 43 keramikys prīškmati.

Vairuokus godus pyrms muzeja rekonstrukcejis keramikys kolekceja globuojuos napījamamūs apstuokļūs – temperatura naatbylda praseibom, mitruma svuorsteibys mainejuos leidz ar godalaikim. Ari namiteiga kolekcejis puorvītuošona nu vīnys telpys iz ūtru atstuoja palīkūšu īspaidu iz itū trauslū kolekceju – atsakluoja pūdu glazurys nūbyrzumi, seikplastikys detaļu pagaisumi, nūškaltys malenis i izsysti rūbi.

2012. godā muzeja kruojuma trausluokuo, nu vierteiguokuo daļa tyka izkuortuota jaunajā globuotuvē. Jau ūtrū godu muzejs aktivi struodoj pi keramikys kolekcejis restauracejis, sasadorbojūt ar profesionalim restauratorim, kuri prīškmatus atjaunoj tik filigrani, ka nimoz navar īvāruot, voi pyrms tam tī bejuši īplaisuojuši voi tim nūlyuzuse kaida detaļa.

2013. godā tyka restaurāts 31 prīškmats, itūgod pi puorvierteibu tyka 43 prīškmati: vāzis, svečturi, ola kausi, skryuzis, ellis trauki i bļūdenis, kū darynuojuši Latgolys keramikys vacmeistari – P. Čerņavskis, P. Vylcāns, A. Zagorskis, A. Paulāns, O. Šmulāns, O. Kuopusteņš, J. Backāns, O. Bogdanovs, J. Viļums, B. Tučs, O. Ušpeļs (seniors) i cyti. Restauratore Jana Lībiete viereigi i smolki ir atjaunuojuse keramikys prīškmatim maituotuos detalis, lepiejuse i nūstyprynuojuse, sleipiejuse i tūniejuse, niu trauki izaver breineigi i eistyn kai jauni.

Projekts realizāts sadarbeibā ar Latgolys regiona atteisteibys agenturu, Vaļsts kulturkapitala fondu i A/S “Latvejis vaļsts meži”.

Karteņā –  svečturs (autors O. Ušpeļs) pyrms i piec restauracejis. Foto: Aleksandrs Bondarenko

Drukavuot