24. janvara vokorā Ventspiļs Olimpiskajā centrā nūtyka kasgadejuos Latvejis Radejis 2 pop i roka dzīšmu aptaujis “Muzykaluo Banka” nūslāgums. Pyrmūreiz tymā pīsadaleja ari grupa “Dabasu Durovys”, kurys dzīsme “Sejas grāmata” klauseituoju i žūrejis kūpviertiejumā tyka atzeita par deveitū lobuokū.

Finala koncertā klauseituoji varēja dzierdēt 15 lobuokuos dzīsmis, kurys viertēja i klauseituoji, i muzykys eksperti. Itūgod ekspertu padūmē beja operdzīduotuoja Sonora Vaice, dirigents Romāns Vanags, muziks, komponists i producents Ingus Ulmanis, komponists Gunārs Freidenfelds, džeza dzīduotuoja Inga Bērziņa, gitarists i komponists Armands Alksnis, muziks i komponists Jānis Ķirsis, muziks, komponists i producents Atis Auzāns, muzykys producents Armands Rušenieks i muzykys žurnalists Sandis Vanzovičs.

Par aptaujis uzvarātuoju jau trešū godu piec kuortys tyka atzeits dzīduotuojs Dons ar dzīsmi “Pāriet bailes”, ūtrajā vītā beja grupa “Musiqq” ar dzīsmi “Sekundes”, nu trejnīku nūslēdze dzīduotuojis Aijis Andrejevys dzīsme “Soļi”.

Latgalīšu muokslinīki “Muzykaluos Bankys” finalā nav bejuši daudz puorstuovāti. Leluokais latgalīšu muzykys panuokums itamā aptaujā ir grupys “Borowa MC” triumfs “Muzykalajā Bankā 2005” ar dzīsmi “Vysskaistuokajai meitinei”, taipat “Borowa MC” ar dzīsmi “Aizlaid pa viejam” 2012. godā aptaujā tyka pi 11. vītys. Sovukuort 2009. gada aptaujā 3. vīta beja Daugovpiļs Oranžuo kora izpiļdeitajai dzīsmei “Ar tavu vārdu”.