Latgolys Kulturviesturis muzejā apsaverama Anatoleja Zelča izstuode

Latgolys Kulturviesturis muzejā apsaverama Anatoleja Zelča izstuode

Da 2. maja Latgolys Kulturviesturis muzejā (Atbreivuošonys alejā 102, Rēzeknē) apsaverama gleznuotuoja Anatoleja Zelča personalizstuode “51. kilometrs”, pīduovojūt retrospektivu īskotu muokslinīka daiļradē.

Gleznuotuojs, Latvejis Muokslys akademejis Latgolys filialis docents Anatolejs Zelčs izstuodē apkūpuojs dorbus, kas atainoj divdesmit divejūs Rēzeknē nūdzeivuotajūs i nūstruoduotajūs godūs padareitū, kotrs gads izstuodē puorstuovāts ar 1 voi 2 dorbim. Muokslinīks puorsvorā struodoj figuraluos kompozicejis i portreta žanrā, izapaužūt vysaidūs formatūs i kolorita rysynuojumūs – nu cīši gaišu da kontrastainu i dzili pīsuotynuotu tūņu.

Anatolejs Zelčs ir dzims 1964. goda 14. aprīlī Bolvu rajona Tiļžā. Pyrmū muokslys izgleiteibu sajiems Rēzeknis Lītiškuos muokslys vydsškolā Keramikys nūdaļā, 1987. godā suocs studēt gleznīceibu Latvejis Muokslys akademejā i 1993. godā absolvējs LMA Gleznīceibys nūdaļu, teikūt pi muokslinīka – gleznuotuoja kvalifikacejis. Juo pedagogi ir bejušī izcilī latvīšu gleznuotuoji Viļs Ozols, Imants Vecozols, Rita Valnere i Uno Danilevskis, zeimietprasmi vuicejīs pi pasnīdzieja Arvīda Būmaņa. 2001. godā dabuojs magistra grādu LMA Muokslys apakšnūzarē. 1998. godā stažiejīs Sanktpīterburgā Krīvejis Muokslys akademejis I. Repina institutā Gleznīceibys, restauracejis i sakraluos gleznīceibys katedrā.

Muokslys pedagoga dorbu struodoj nu 1990. goda, ir struoduojs Reigys Lītiškuos muokslys vydsškolā, jau nu 1993. goda da ituos šaļts ir Rēzeknis Muokslys i dizaina vydsškolys pedagogs, juo vadeibā audziekni vuicuos gleznuošonu, zeimiešonu, kompoziceju, gleznīceibys tehnologejis i anatomeju. Nu 1994. goda ir Latvejis Muokslys akademejis Latgolys filialis pasnīdziejs, itūšaļt – docents.

Rodūšajā darbeibā eipaši interesej cylvāka anatomejis pieteišona i gleznīceibys tehnologejis. Latvejis Muokslys savīneibys bīdrs nu 2007. goda, pīsadaleja ap 60 kūpiejuos i sareikuojs 8 personalizstuodis Latvejā i uorzemēs.

Karteņa: Anatolejs Zelčs “Pieskāriens”, 2015, kūksne, jaukta tehnika, 72×100.

Print Friendly, PDF & Email

Kalenders

Jul
12
Pīk
all-day Fotoizstuode “Piecgarša” @ Storptautyskuo lidūsta "Reiga"
Fotoizstuode “Piecgarša” @ Storptautyskuo lidūsta "Reiga"
Jul 12 all-day
Pyrmūdiņ, 17. junī, īzeimejūt Juoņa dīnys nedeļu, Reigys storptautyskajā lidūstā tyka atkluota bīdreibys “Latgolys etnografiskuo viestnīceiba” latvīšu tautystārpim i tymūs apviļktajom mozajom lelem – Annužom – veļteituo fotoizstuode “Piecgarša”. Izstuode Reigā ir starts vasalai streipei[...]
18:00 Daņči @ Veseleibys sola
Daņči @ Veseleibys sola
Jul 12 @ 18:00 – 21:00
Daņči @ Veseleibys sola
18:00 Rēzeknis nūvoda dīnys @ Rēzeknis nūvods
Rēzeknis nūvoda dīnys @ Rēzeknis nūvods
Jul 12 @ 18:00 – Jul 14 @ 23:45
Rēzeknis nūvoda dīnys @ Rēzeknis nūvods