Naujinē svieteis pogosta svātkus

Naujinē svieteis pogosta svātkus

Daugovpiļs nūvoda Naujinis pogostā nu 28. da 31. maja nūtiks pogosta svātki “Kad ziedu pļavā bites san…”, kuru laikā vītiejim dzeivuotuojim i gostim tiks pīduovuotys daudzveideigys nūtikšonys – i sporta saceņseibys i spēlis, i rodūšuos darbneicys i koncerti. Svātku laikā tiks eipaši sumynuoti Naujinis pogosta dzeivuotuoji, kuri izaceļ ar sovu struodeigumu i sasnāgumim.

Catūrtdiņ, 28. majā Naujinis Nūvodpietnīceibys muzejā 10 stuņdēs suoksīs vītiejūs biškūpu saliduojums, mada degustaceja i konkurss “Naujenes medus 2015”. Sovukuort vokorā Vacstrūpūs sporta laukumā 18.00 ar koncertu i pogosta puorvaļdneicys Inārys Miglānis uzrunu nūtiks svineiguo svātku atkluošona, nu vokora golvonuo nūtikšona – Tāvu i dālu minifutbola spēle.

Pīktdiņ, 29. majā Locikūs pi Naujinis Kulturys centra 11.30 suoksīs pleners bārnim “Sapņu ainava”, kurā ar meistarklasi pīsadaleis muokslineica Anita Karpenko. Vokorā Kraujā, Naujinis Jaunatnis iniciativys i sporta centrā, nūtiks pogosta cīmu sporta komandu spēlis futbolā i strītbolā. Saceņseibuos tiks izceineits Eduarda Iekalna pīminis kauss futbolā, tai eipaši pīmynūt ilggadiejū Naujinis sporta kluba pyrmū direktoru i treneri.

Sastdiņ, 30. majā pasuokumi nūtiks paraleli i Naujinē, i Locikūs. Naujinē, Naujinis Nūvodpietnīceibys muzejs, kas sevi sauc par Latgolys regionā modernuokū muzeju, nu 13.00 da 18.00 pīduovuos bez moksys apsavērt muzeja ekspozicejis i izstuodis, bet nu 15.00 da 18.00 – pīsadaleit stykla apgleznuošonys rodūšajā darbneicā.

Sovukuort Locikūs, Naujinis Kulturys centrā i tuo apleicīnē, sastdiņ jau nu 13.00 dorbuosīs omotnīku i sātys ražuotuoju tierdzeņš. 14.00 suoksīs Naujinīšu koncerts, kurā uzastuos pogosta školu i kulturys centra kolektivi i kura laikā tiks sveikti pogostā jaundzymušī bārni. Piec koncerta – izrūtuotu rateņu paruode i vysaidys sportiskys i rodūšys aktivitatis saimem. Laikā nu 15.30 da 17.30 planavuoti īlu vyngruotuoju paraugdemonstriejumi, saimu sporta spēlis, armrestlings i cytys aktivitatis. Itymā laikā byus vareiba leidzadorbuot rodūšajuos darbneicuos – dekorativūs karūdzeņu fabrikā, bišu darbneicā, sveču līšonā, daņčūs i rūtaļuos, kai ari vērtīs keramikys puļceņa paraugdemonstriejumus, ļautīs sejis apgleznuošonai voi izzynuot pogostā asūšuo Jezupovys parka dobys vierteibys Daugovpiļs Universitatis Zaļuos laboratorejis pietnīku vadeibā. Pa dīnu byus breivi pīejamys pīpyušamuos atrakcejis bārnim, svātku zupa, fotostyureits, dzeivinīku apsavieršona.

Locikūs, Naujinis Kulturys centrā sastdīnis vokorā 18.00 koncertēs Naujinis Muzykys i muokslys školys akordeonistu orkestris, kas itūgod svietej 20 godu jubileju. Pasuokuma laikā tiks sveikti dzeivuotuoji, ar kurim lepojās Naujinis pogosts. Dīnys nūslāgumā naujinīšus i gostus ar koncertu prīcynuos grupa “Latgolys dāmu pops”.

Svātdiņ, 31. majā Naujinē, Jezupovys Sv. Pītera i sv. Puovula Rūmys katuoļu bazneicā 10.00 tiks svieteits Svātais Mišs, piec kura nūtiks Goreiguos muzykys koncerts, kurā uzastuos dzīsmineica Laura Bicāne, draudzis varganiste Zita Nitiša, flautiste Duorte Stašāne i Vabalis pogosta etnografiskais ansamblis “Vabalis”.

Naujinis pogosta svātki teik reikuoti ūtrū godu, ļaunūt svātku jutūnē sasatikt cylvākim, kuri dzeivoj, struodoj, vuicuos, gastej, atsapyuš Naujinis pogostā, i dūmūt vareibu īpazeit aktivu leidzcylvāku sasnāgumus, daleitīs i aizraut ar sovim talantiem, prasmem.

naujines svatki

Print Friendly, PDF & Email

Kalenders

Jun
16
Svā
all-day Izstuode “Juoņs nu Dzeņagola” @ Latgolys Kulturviesturis muzejs
Izstuode “Juoņs nu Dzeņagola” @ Latgolys Kulturviesturis muzejs
Jun 16 all-day
Izstuode byus veļteita muokslinīkam i literatam Juoņam Trūpam (1924-1989), pīmynūt jū symtgadē. Koč i sovys dzeivis leluokū daļu J. Trūps ir pavadejs trymdā, dzeivuodams ASV natuoli nu golvyspiļsātys Vašingtonys, vystik vysu sovu rodūšū darbeibu, breivū[...]
all-day Jevgenija Bondarenko izstuode “D... @ Latgolys Kulturviesturis muzejs
Jevgenija Bondarenko izstuode “D... @ Latgolys Kulturviesturis muzejs
Jun 16 all-day
Muokslinīks Jevgenijs Bondarenko ir riezeknīts i ar gleznīceibu nūsadorboj nu Latvejis Muokslys akademejis Latgolys filialis absolviešonys 2011. godā. Gleznuotuojs aktivi īsakļaun muokslys dzeivē, pīsadolūt kūpejuos Latgolys muokslinīku izstuodēs i plenerūs. Sovu pyrmū personalizstuodi “Maiguma ārprāts”[...]
all-day Karīnys Ludbuoržys izstuode “Zie... @ Latgolys Kulturviesturis muzejs
Karīnys Ludbuoržys izstuode “Zie... @ Latgolys Kulturviesturis muzejs
Jun 16 all-day
Riezeknīte Karīna Ludbuorža piec garuoka laika pūsma, kod turpynuoja muokslys studejis Vuocejā doktoranturys programā, otkon pīduovoj sovu dorbu izstuodi Latgolys Kulturviesturis muzejā. Muokslineicys jaunuokī dorbi aplīcynoj juos interesi par viesturi i vysaidu pasauļa tautu mitologeju.[...]