Viļānu nūvoda īdzeivuotuojus i gostus 10. oktobrī aicynoj iz Viļānu nūvodpietnīceibys muzeja, bibliotekys i kulturys noma atkluošonu piec renovacejis. Renovātuos kulturys īstuodis atkluos ar virkni nūtikšonu vysys dīnys garumā.

Piec vairuoku godu gaideišonys i atsarasšonuos pagaidu telpuos Viļānu kulturys īstuodis beidzūt atsagrīzs sovuos – renovātajuos i dorbam pīmāruotajuos – telpuos. „10. oktobris byus nūzeimeiga dīna Viļānūs, kod vysys dīnys garumā nūtiks svineigī lentu grīzšonys pasuokumi i muzykali puorsteigumi, bys īspieja redzēt vairuokys izstuodis,” informej Viļānu kulturys noma muokslinīciskuos dalis vadeituoja Agita Vigupe.

Nūtikšonu cyklys suoksīs 15 stuņdēs ar īvodvuordim pi strūklakys (Kulturys laukumā 2). Sovukuort 15:30 stuņdēs sekuos Viļānu nūvodpietnīceibys muzeja atkluošona, 16:00 – Viļānu piļsātys bibliotekys atkluošona i 16:30 – Viļānu kulturys noma svineiguos lentys puorgrīzšona.

Iz svineigū koncertu nūvoda īdzeivuotuoji i gosti aicynuoti 17 stuņdēs, piec koncerta jaunū deju greidu varēs īmieginuot balā ar grupu „Galaktika”. Īeja vysūs pasuokumūs bez moksys.

Atkluošonys reizē byus vareiba apsavērt vairuoku personeibu izstuodis, kuru dzeivis guojums saisteits ar Viļānu pusi. Viļānu piļsātys bibliotekys telpuos byus apsaverama fotografeju izstuode „Cik sen tas bij…”, Danys Podniekys fotografeju izstuode i Viļānu Muzykys i muokslys školys audziekņu dorbu izstuode „Mana pilsēta”. Viļānu nūvodpietnīceibys muzejā – Marutas Raudes „Sviniešona” – porcelans i cyti dorbi, kai ari Osvalda Zvejsalnīka gleznu izstuode. Sovukuort Viļānu kulturys nomā iztuodeis Ērika Sondora gleznys.

Kulturys nomu Viļānūs atkluoja 1953. godā, piļsātai atsateistūt, roduos vajadzeiba piec plašuokom telpom. 1982. godā atkluoja bibliotekys āku, bet nu 1996. goda kulturas noma ākā dorbojās ari Viļānu nūvodpietnīceibys muzejs. Piec daudzim ekspluatacejis godim itom ākom beja vajadzeigi vierīneigi rekonstrukcejis dorbi, kurus eistynuoja 2015. godā.

Viesti sagataveja: LaKuGa
Karteņa: publicitatis foto