Izstuodē LNB byus apsaverama ari drukys aizlīguma laika literatura

Izstuodē LNB byus apsaverama ari drukys aizlīguma laika literatura

16. novembrī 18.00 Latvejis Nacionaluos bibliotekys (LNB) 1. stuovā nūtiks izstuodis “Nevar nerakstīt” atkluošona. Ekspoziceja ir veļteita trejom naparostom epizodem raksteituo vuorda viesturē: bruoļu draudžu rūkroksta literaturai Vydzemē 18. gs. vydā, drukys aizlīgumam Latgolā 19. gs. ūtrajā pusē, kai ari Sibirī iz bārza tuoss raksteituom viestulem padūmu represeju apstuokļūs 20. gs. 40. godūs, informej LNB puorstuovs Augusts Zilberts. Itī treis viesturiskī pūsmi pīvierš viereibu raksteituo vuorda nūzeimei cylvāku dzeivēs, kod individa breiveibys īrūbežuošonys apstuokļūs raksteišona beja napīcīšameiba i izalausšonys vareiba.

Bruoļu draudžu kusteibys īīšona Vydzemē saistejuos ar rūkroksta literaturys tradicejis izaveiduošonu i latvīšu zemnīku pyrmajim literarajim mieginuojumim. Raksteitais vuords na mozuok nūzeimeigs beja ari latiņu drukys aizlīguma laikā Latgolā, kod ar rūkroksta gruomotnīceibys paleidzeibu latgalīši gondreiž 40 godu garumā (1865-1904) raudzeja kompeņsēt īspīstūs gruomotu tryukumu i saglobuot sovu identitati. Piečuok, padūmu okupacejis laikā, iz Sibiri izsyuteitajim Latvejis dzeivuotuojim raksteitais vuords palyka tik napīcīšams, ka papeira napīejameiba nabeja škierslis – cylvāki viestuļu raksteišonai sovim tyvinīkim izmontuoja bārza tuosi.

Izstuodis satura pamatā ir unikali materiali nu LNB i 11 Latvejis muzeju i biblioteku kruojumu. Ite byus apsaverami nūzeimeigi bruoļu draudžu rūkroksta literaturys paraugi, īspīddorbi i pyrmī latvīšu literarī mieginuojumi. Reizē ekspoziceju veidoj latgalīšu rūkroksta literatura i Latgolā kontrabandys ceļā īvasti izdavumi ar vyltuotom izdūšonys ziņom nu vītu, kuruos latiņu drukys aizlīgums napastuovieja. Izstuodē īkļautys ari Sibirī iz bārza tuosim raksteitys viestulis nu īslūdzejuma voi spaidu dorbu nūmetnem i apsamesšonys vītom. Tamā pyrmūreiz vīnā vītā apsaverami vysi bārza tuoss viestuļu originali, kas īkļauti UNESCO programys “Pasaules atmiņa” Latvejis nacionalajā registrā.

Izstuodi reikoj LNB sadarbeibā ar Tukuma muzeju. Tei aizsuoc Latvejis vaļsts symtgadei veļteitūs pasuokumu cyklu LNB. Ekspoziceja byus apsaverama da 2016. goda 27. marta. Īīšona bez moksys.

Print Friendly, PDF & Email

Kalenders

May
30
Cat
13:00 Daugovpiļs piļsātys svātki @ Daugovpiļs
Daugovpiļs piļsātys svātki @ Daugovpiļs
May 30 @ 13:00 – Jun 2 @ 19:00
Nu 31. maja da 2. juņa Daugovpiļs piļsāta svieteis sovu 749. dzimšonys dīnu, aicynojūt daugovpilīšus i gostus iz kūpeigom svineibom – piļsātys svātkim „Mana pils – Daugavpils!”. Treis dīnu garumā byus vareiba baudeit vysaidys koncertprogramys,[...]