Daugovpilī 28. novembrī 19.00 Latgolys Centraluos bibliotekys trešajā stuovā nūtiks dzejis konkurss “Dzejas slams”, kurymā pīsadaleit var sevkurs dzejūļu autors. Pasuokuma mierkis ir atkluot jaunūs talantus, dūt jim vareibu aplīcynuot sevi, informej organizaceja “D’SAINT”.

Konkurss nūtiks trejūs pūsmūs, kotrā tiks izvālāti lobuokī autori. Uzvarātuojs sajims ari naudys bolvu.

Kotram dalinīkam tiks dūtys 3 minutys, kuru laikā varēs nūskaiteit tik daudz dzejūļu, cik viņ gryb. Tok tiks vārtāts na tik daiļdorba saturs, nu ari pasnīgšonys forma. Atzineigai tiks nūvārtātys originalys performaņcis, artistisks voi vīnkuoršai izteiksmeigs izpiļdejums. Žūrejā byus dzejis jūmu puorzynūši cylvāki, tiks jimts vārā ari skateituoju nūviertiejums. Dalinīku vacums i dzejis volūda nav svareiga.

Īīšona pasuokumā byus bez moksys, nu dasasaceit daleibai īteicams jau īprīšk, rokstūt iz dzejaslems@mail.com.

Piec konkursa beigu ir planavuots “breivais mikrofons”, kas byus pīeimams vysim intereseņtim, kurī gryb izapaust dzejis formā. Itei pasuokuma daļa nūtiks jau vītejuo bāra “Artilērijas pagrabi” neformalā jutūnē piec 22.00.

Pasuokumu organizej bezpeļnis organizaceja “D’SAINT” sadarbeibā ar skaņu īrokstu studeju “Sound Way”, kai ari Daugovpiļs piļsātys dūmis i Daugovpiļs Jaunatnis departamenta atbolstu.