Daugovpiļs Universitatis studentu deju ansamblis “Laima” aicynoj skateituojus iz 60 godu jubileja koncertim Daugovpilī, Kruoslovā i Leivuonā.

Kai informej Daugovpiļs Universitatis puorstuovi, sovā jubilejā “Laima” ruodeis treis dažaidus deju izvadumus, apvīnuotus vīnā koncertā: “Riti, riti” (1997) tyka ruodeits Daugovpiļs M. Lutera katedralē Storptautyskuo Teatra festivala “Dzeltenais dzenis” ītvorūs, “Pie Dieviņa gari galdi” (2001) – “Rīgai 800” dzīšmu i deju svātku īskanis lelizvadumā “Četri meti” Dailis teatrī, nu deju kokteiļs ar studentisku goru, atraktivitati i degsmi “Tumba, tumba” veiduots kai duovona bejušajai “Laimys” vadeituojai Renātei Ērmanei 80 godu jubilejā.

Deju ansambļa pyrmsuokumi datejami ar 1955. godu, kod sovu darbeibu suoce nalels doncuotuoju puļceņš Genovefys Barkovskys vadeibā. Sovukuort “Laimys” lelais ceļš aizasuoce, kolektivā īeimūt Leonidam Petrovam, kurs īguļdeja tuo veiduošonā lelu dorbu. Juo vadeibā 1965. godā kolektivs sajēme gūda nūsaukumu – Tautys deju ansamblis “Laima”. Tikpat nūzeimeigus pādus tautys deju ansambļa rodūšajā darbeibā ir atstuojuši Ludis Poselis i Renāte Ērmane. 1985. godā par ansambļa muokslinīcyskū vadeituoju suoka struoduot Elmārs Belinskis, kurs tū dora ari itūšaļt.

Īīšona koncertūs – par zīduojumim.