23. janvara vokorā Ventspilī nūtyka Latvejis Radejis 2 pop i roka dzīšmu aptaujis Muzykaluo Banka nūslāgums. Latgalīšu grupys “Dabasu Durovys” izpiļdeituo “Šūpuļdziesma” itūreiz klauseituoju i žūrejis kūpviertejumā tyka pi 12. vītys.

Finala koncertā klauseituoji varēja dzierdēt 15 lobuokuos dzīsmis, kurys viertēja i klauseituoji, i muzykys eksperti. Itūgod ekspertu padūmē beja latvīšu izceļsmis Holivudys komponiste i “Emmy” bolvys sajiemieja Lolita Ritmanis, komponists, pianists, aranžātuojs i producents Juoņs Strazds, etnomuzykologs i komponists Valdis Muktupāvels, operdzīduotuoja Inga Šļubovska, pianists Raimonds Petrauskis, dzīduotuoja i vokaluo pedagoge Ance Krauze, dzīduotuojs, vokalais pedagogs i komponists Adrians Kukuvass, džeza dzīduotuojs Daumants Kalniņš, televizejis režisors Arvīds Babris i ilggadejais “Mikrofona” aptaujis veiduotuojs Gunārs Jākobsons.

Aptaujis uzvarātuoju gūdā itūgod – grupa “Prāta Vētra” ar dzīsmi “Ziemu apēst”. Ūtrajā vītā īsarynduoja latgalīša Kārļa Juosta puorstuovātuos grupys “The Sound Poets” dzīsme “Viss var mainīties”, nu trešais palyka aptaujis treiskuortejais laureats Dons ar dzīsmi “Dieviņš”.

Juoatguodynoj, ka viņgod “Dabasu Durovys” debitēja Muzykaluos Bankys finalā ar 9. vītu, izpyldūt dzīsmi “Sejas grāmata”.

Karteņa: twitter.com