Naujinē svieteis pogosta svātkus

Naujinē svieteis pogosta svātkus

Daugovpiļs nūvoda Naujinis pogostā 29. majā nūtiks pogosta svātki “Te rītdiena un senatne”. Svātki nūtiks viesturiskajā Jezupovys muižys parkā, kurs veiduots 19. gs. beiguos pi bejušuo Jezupovys muižys kuorma. Kai viestej viesturiskuos līceibys, par itū montuojumu juopasasoka pūļu muižnīku Šadursku dzymtai. 17. gs. Dinaburgys piļs apleicīnē pūļu muižnīks Juzefs Šadurskis iz sovys zemis izveiduoja muižu, nūsaucūt tū par Jezupovu (Juzefovu). 19. gs. beiguos Jezupovys muižu montuoja Bogdans i Marians Šahno, daudzys muižys, tymā skaitā Jezupovys muiža, tymūs laikūs palyka par kulturys centrim. Ari šudiņ Naujinis pogosts ir leluokais pogosts dzeivuotuoju skaita ziņā Daugovpiļs nūvodā.

Kai informej Naujinis Kulturys centra direktore Olga Kuzmina, pogosta svātku laikā vītejim dzeivuotuojim i gostim tiks pīduovuotys daudzveideigys nūtikšonys – i sporta saceņseibys i spēlis, i rodūšuos darbneicys i koncerti.

Naujinis pogosta svātki īsasuoks ar ūzulu stateišonu Naujinis parkā pi pogosta puorvaļdis kuorma 12.30, sovukuort Naujinis pogosta svātku atkluošonys koncerts īsasuoks 14.00 Jezupovys parkā. Koncertā pīsadaleis Naujinis pogosta īstuožu rodūšī kolektivi, tiks sveikti pogostā jaundzymušī bārni. Piec koncerta vysi vacuoki ar bārnim rateņūs teik aicynuoti iz “Mazo kariešu parādi”, kuruos laikā tiks nūsaceiti vysinteresantuok i originaluok izrūtuotī rateni.

15.00 īsasuoks mozūs muokslinīku pleners “Juzefovas parka ainavu valdzinājumā”, kurū vadeis muokslineica Anita Karpenko.

Paraleli byus vareiba leidzadorbuot rodūšajuos darbneicuos – keramikys darbneicā, origami darbneicā, daņčūs i rūtaļuos, ļautīs sejis apgleznuošonai voi izzynuot pogostā asūšuo Jezupovys parka dobys vierteibys Daugovpiļs Universitatis Zaļuos laboratorejis pietnīku vadeibā. Pa dīnu byus breivi daīmamys pīpyušamuos atrakcejis bārnim, svātku cīnasts “Muižnieka gardums”, retro foto styureits i cytys aktivitatis.

Naujinis Nūvodpietnīceibys muzejs, kas ir itūšaļt Latgolys regionā modernuokais muzejs, nu 10.00 da 17.00 pīduovuos bez moksys apsavērt muzeja ekspozicejis i izstuodis, nu 14.00 dorbuosīs omotnīku i sātys ražuotuoju tierdzeņš.

Pyrma vokora koncerta 17.50 naujinīši i gosti teik aicynuoti iz kūpbiļdis uzjimšonu. Aerofoto uzjims, nu pyrma tuo demonstrēs aerofoto tehnikys vareibys, fotografs Ivars Utināns.

Vokora koncertā 18.00 ar ļusteigom dejom skateituojus prīcynuos Naujinis kulturys centra videjuos paaudzis deju kolektivs “Dveina”, ar dzīsmem apbūrs Naujinis pogosta dzeivuotuoja i skaneiga bolsa eipašneica Zita Nitiša, nu nūslāgumā naujinīšus i gostus ar koncertu prīcynuos grupa “Dabasu Durovys”.

Naujinis pogosta svātki teik reikuoti trešū godu, ļaunūt svātku jutūnē sasatikt cylvākim, kurī dzeivoj, struodoj, vuicuos, gastej, atsapyuš Naujinis pogostā, i dūmūt vareibu īpazeit aktivu leidzcylvāku panuokumus, sasnāgumus, pasadaleit i aizraut ar sovim talantim i prasmem.

afisa 2016

Print Friendly, PDF & Email

Kalenders

Apr
25
Cat
11:00 Festivals “Steigys” @ Juoņa Ivanova Rēzeknis muzykys vydsškola
Festivals “Steigys” @ Juoņa Ivanova Rēzeknis muzykys vydsškola
Apr 25 @ 11:00 – 17:00
Festivals "Steigys" @ Juoņa Ivanova Rēzeknis muzykys vydsškola
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Apr 25 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]
19:00 Koncerts “Celīs, bruoļ!” @ VEF Kulturys piļs
Koncerts “Celīs, bruoļ!” @ VEF Kulturys piļs
Apr 25 @ 19:00 – 21:00
Koncertā pīsadola kai jau populari i labi pazeistami, tai i pavysam jauni, dažaidus muzykys stilus puorstuovūši muokslinīki: Juoņs Aišpurs (THE SOUND POETS), Arņs Slobožaņins (DABASU DUROVYS), Guntis Rasims i Jurs Vucāns (BEZ PVN), Jurs Ostrovskis[...]