30. septembrī Preiļu nūvoda Solys pamatškolā nūtyka sirsneigs omotnīku bīdreibys “Austra” sagataveituos omotu gruomotys “Saiminīka Prāca” prezentacejis pasuokums, kurā pīsadaleja omotnīku bīdreibys dybynuotuoji Anita Puncule, Anita Vjakse i Uldis Čerpakovskis, Preiļu apleicīnis omotnīki, Solys pamatškolys audziekni i pedagogi, Preiļu nūvoda dūmis puorstuovi i lels interesentu pulks, informej Preiļu nūvoda pošvaļdeiba. Pasuokumu rūtuoja Solys pamatškolys mozī doncuotuoji, kai ari folklorys kūpys “Dzeipureņš” i dzīduotuojis Džeinys Gavaris uzastuošona.

Gruomotā “Saiminīka Prāca” ir īkļauta informaceja par apzynuotajim meistarim, kontakti, dorbu aproksti i kartenis. Paradzāts, ka itei gruomota nikod natiks pabeigta – tei vysod tiks papyldynuota ar jaunu informaceju par jaunim omotnīkim, kas ar sovu iniciativu i rodūšumu sekmēs omotnīceibys nūzaris ilgtspiejeibu i nūdūšonu cytom paaudzem.

Kluotyn asūšī izsaceja prīcu par veiksmeigi izlaseitū gruomotys nūsaukumu, kurā izmontuots latgalīšu vuords “prāca”, ar kū apzeimoj dorbu. Partū daudzi dalejuos sovuos atmiņuos nu bierneibys, kod itū vuordu kasdīnā lītuojuse muote voi baba, i sprīde par prācys nūzeimis niansem.

Anita Puncule nūruodeja, ka ar gruomotu “Saiminīka Prāca” tuos veiduotuoji gryb īvuiceit skaistū, vysupyrma, bārnim i nūdūt tū tuoļuok, partū ka gruomotai na vysod ir juostuov bibliotekys plauktā. Tai kai gruomota ir papyldynojama, da Latvejis symtgadis ir dūmuots atrast i apkūpuot informaceju par 100 “zalta” cylvākim – omotu pratiejim.

Unikals ir na tik gruomotys saturs, nu ari dizains – tū nu sapluokšņa veiduojs Juoņs Ziemelis: “Tys ir muns redzīņs par laikmeteigu omotu gruomotu, kura varātu byut īdereiga myusu dīnu sabīdreibā, i kas izcaltu tuos prasmis, kū muokam i kas sasagloboj myusu regionā. Prīca, ka gruomota ir saguojuse i dūmys ir materializiejušuos!” Omotnīku apzynuošonā lelu dorbu veice Inese Anina, sovukuort daudzūs darynuojumus karteņuos īmyužynuoja Džeina Gavare.

Preiļu nūvoda Uzjiemiejdarbeibys centra vadeituoja, dūmis deputate Ineta Liepniece nūruodeja, ka da omotnīku bīdreibys “Austra” izveidis omotnīceibys jūmā Preiļu pusē beja miļzeigs puorruovums daudzu godu garumā, i izsaceja prīcu, ka itys bīdreibys pyrmais projekts ir tik labi saguojs.

Vydslatgolys puornūvodu fonda puorstuove Valija Vaivode saceja, ka, pasasokūt omotnīku bīdreibai i itai gruomotai, varēs zynuot, kai atrast vajadzeigū omotu meistaru, partū ka, koč i Latgola izaceļ ar sovim omotnīkim, īprīkš na vysod bejs zynoms, pi kuo taišni dasagrīzt.

Gruomota izveiduota, realizejūt projektu “Seno amata prasmju un to meistaru apzināšana amatniecības nozarēs un mazā biznesa attīstībai Preiļu novadā”, pasasokūt mozūs grantu projektu konkursam “Iedzīvotāji veido savu vidi – 2016”, kū organizēja nūdybynuojums “Viduslatgales pārnovadu fonds” ar Preiļu nūvoda pošvaļdeibys finansialū atbolstu.