Pīktdiņ, 14. oktobrī, 18.00 Vīneibys noma koncertzalā V Muzykys i Muokslys festivala “Daugavpils ReStArt 2016” izskaņā nūtiks kora muzykys koncerts, kas veļteits Latvejis naatkareibys atjaunuošonys 25. godadīnai, viestej informaceja Daugovpiļs piļsātys sātyslopā.

Turpynojūt 2010. godā Terēzis Brokys aizsuoktū koru sasadzīduošonu Daugovpilī, ari itūgod iz skaneigu koncertu sovus klauseituojus aicynoj kori nu Latgolys: Daugovpiļs Latvīšu kulturys centra (LKC) sīvīšu kors “Rūta” (dirigente Maruta Veličko), Daugovpiļs LKC jauktais kors “Daugava” (dirigents Jevgenijs Ustinskovs), Daugovpiļs nūvoda kulturys centra jauktais kors “Latgale” (dirigente Anita Zarāne), Preiļu nūvoda školuotuoju kors “Latgale” (dirigents Edgars Znutiņš), Rēzeknis Augstškolys jauktais kors “Sonitum” (dirigents Juoņs Mežinskis), Rēzeknis veiru kors “Graidi” (dirigents Juoņs Mežinskis). Koncerta laikā varēs dzierdēt i kotra kolektiva atsevišku skaniejumu, i kūpkora vareigū dzīduojumu. Klauseituojim asūt sagataveits ari puorsteigums.

Koncerta laikā izskanēs skaistuokuos Latvejis komponistu dzīsmis, vokalizis i latvīšu i latgalīšu tautys dzīšmu apdaris. Īīšona koncertā bez moksys.