Taišni Pīterdīnā, 29. junī, 16.00 Reigys Tehniskuos universitatis Arhitekturys fakultatē Reigā tiks atkluota pasauļslovonuo latvīšu muokslinīka, keramika Pītera Martinsona tušys zeimiejumu izstuode nu Daugovpiļs Marka Rotko muokslys centra kolekcejis, informej muokslys centra puorstuovi.

Atzeimojūt Pīterdīnu, Daugovpiļs Marka Rotko muokslys centrys sadarbeibā ar Reigys Tehniskū universitati pīduovoj muokslys nūtikšonu interesentim apsavērt latvīšu vacmeistara, daugavpilīša Pītera Martinsona tušys zeimiejumu dorbu izstuodi. Tušys zeimiejumim Pīters Martinsons aktivuok dasavērse 20. gs. 70. godūs, i kluotyn keramikai tī kolpuoja par muokslinīka naatjemamu rodūšuos kasdīnys sastuovdaļu.

Izstuodē byus apsaverami divdesmit treis vysaiduoka izmāra tušys zeimiejumi ar akvareļu kruosaineibu nu Daugovpiļs Marka Rotko muokslys centra kolekcejis, kas radeiti vaira kai divdesmit godu garumā i itūšaļt veidoj nūzeimeigu muokslinīka atstuotuo montuojuma sastuovdaļu. 

Izstuodis organizatori pastreipoj ari izstuodei atvālātuos vītys nūzeimi Pītera Martinsona dzeivē, partū ka “Ķīpsalas keramikas” rodūšuos darbneicys beja pyrmuo i ilgus godus uzticeiguo muokslinīka rodūšūs īceru realizacejis vīta, ideju i pīredzis apmainis centrys.

Izstuode apmeklātuojim daīmama nu 29. juņa da 30. juļa Reigys Tehniskuos universitatis Arhitekturys fakultatē, Reigā, Kīpsolys īlā 6.