Latgola puorstuovāta storptautyskajā muokslys festivalā “Slavjankij Bazar 2017” Vitebskā
Nu 10. da 19. juļa Vitebskā (Boltkrīveja) nūtyka XXVI kasgadejais storptautyskais muokslys festivals “Slavjankij Bazar 2017”, kurs vysod puļcej tyukstūšom apmaklātuoju i nu Boltkrīvejis, i tyvuokuo pīrūbeža i cytu vaļstu. Kai informej bīdreibys “Latgales kulinārā mantojuma centrs” puorstuove Tatjana Kozačuka, pasasokūt ituos bīdreibys i Latgolys turisma asociacejis “Ezerzeme” sadarbeibai ar Vitebskys regiona izpyldkomiteju i LR konsulatu Vitebskā, laikā nu 12. da 17. juļa festivalā pīsadaleja ari Latgolys kulinaruo montuojuma teikla dalinīki, amatnīki i meistari nu Ludzys, Rēzeknis, Kruoslovys, Preiļu i Zylupis nūvoda, kai ari Ludzys tautys noma folklorys kūpa “Dzeipori”.
Latgolys regiona amatnīki plotai pīsadaleja tradicionalajā amatnīku tierdzeņā “Meistaru pilsēta”. Bīdreiba “Ludzas amatnieks” pīduovoja keramikys i kaļva produkceju, vylnys, lyna i auduma izstruoduojumus, kai ari Latgolys kulinaruo montuojuma iedīņus – palākūs zierņus ar špeku, blīnus. Apmaklātuojim beja vareiba redzēt senejūs baltu rūtu kaļšonys procesu, kū ruodeja bīdreiba “Kroma kolns”.
Kruoslovys nūvoda TIC specialisti i amatnīki īpazeistynuoja festivala apmaklātuojus ar Latgolys regiona turisma resursim i produktim, pīduovuoja īsaguoduot gordūs Z/S “Kurmīši” čajus, kas teik audzāti dobys parka “Daugavas loki” teritorejā, kai ari uodys rūtys, kūka izstruoduojumus i cytu amatnīceibys produkceju.
Zylupis nūvoda Pasīnis pogosta puorstuovi pīduovuoja eipašā tehnikā veiduotus syltus šaļus i dekorativuos svecis, kai ari vareibu pīsadaleit adeišonys meistarklasē.
Rēzeknis piļsāta prezentēja Latgolys tradicionalūs vylnys placu lokotus i lyna šaļus, sovpus bīdreiba “Latgolys golds” aicynuoja nūgaršuot i īsaguoduot tradicionalūs Latgolys kulinaruo montuojuma iedīņus – rudzu blīnus, špeku, kvasu i cytus.
Festivala dalinīkim beja breineiga vareiba nūraudzēt blīnus, kurūs iz vītys cepe uzjāmums “Pampūkas” nu Preiļu, kai ari īsaguoduot keramika Raivo Andersona kruosom glazātuos keramikys izstruoduojumus.
Pasuokuma laikā storptautyskuo muokslys festivala apmaklātuojim tyka prezentātys vysaiduokys myusu regiona vierteibys: boguotais kulturviesturiskais montuojums, gleznainuo doba, senejuos amatnīceibys tradicejis, kulinarais montuojums i latgalīšu vīsmīleiba.
Latgolys regiona puorstuovu daleiba festivalā veicynoj sadarbeibu regionu storpā, kūpeigys kulturys izzynuošonu i atteisteibu, kulinaruo montuojuma i amatnīceibys saglobuošonu i populariziešonu, kai ari Latgolys turisma pīduovuojuma marketingu.
