Apvīneiba “Misters & Nospiedumi” jaunajā albumā veļtej dzīsmi regionim

Apvīneiba “Misters & Nospiedumi” jaunajā albumā veļtej dzīsmi regionim

Tikkū izguojs apvīneibys “Misters & Nospiedumi” jaunais albums “Nospiedumi”, kas ir pyrmais Latvejā radeitais albums folk-hiphop stylā. Albumā ir 14 dzīšmu, nu kurūs vysa popularuokuo da ituo bejuse “Darbu raugi”, bet dzīsmē “Reģioni” īsaskaņ ari latgalīšu volūda.

“Misters & Nospiedumi” ir muzykys apvīneiba, kuruos unikalais skaniejums apvīnoj tautys muzykys elementus ar elektroniku, hip-hop rytmim, kai ari repuošonu. Kolektivā ir treis muziki: Misters (vokals, repers ar pīredzi), Noitro (elektroniskuos muzykys producents) i Edgars Zilberts (kūkle, tautys muzykys puorzynuotuojs).

Albums “Nospiedumi” radeits dažaidu muziķu sadarbeibys rezultatā i vīni nu sadarbeibys muzikim ir ari Ūga nu apvīneibys “Ausmeņa Records” i DJ Monsta, kurū Latgolā vaira īpazyna nu sadarbeibys albuma ar Birutu Ozoliņu. Albuma dzīšmu topšonā kai gosti taipat pīsadalejuši ansis, Edavārdi, Cockroach Prophets, kai ari Imanta Nīgale i Alise Joste. Muzykalūs pavadejumus taisejuši Noitro, Ziggy Marbley, ansis, Fakts, Itbangz, Rihards Štrauss, bet instrumentali pavadejumu albumā taisejuši: Edgars Zilberts (kūkle, akustiskuo gitara, akordeons), Audris Ločmelis i Mārtiņš Abajs (basgitara), Inese Neimane (blokflauta), Krišjānis Sils i Imanta Nīgale (mandolina), Jumis Ločmelis (dūdys).

Vaicuots par sadarbeibu ar Ūgu nu “Ausmeņa Records” i izvēli kaidā dzīsmē īkļaut ari latgaliski dzīduotus gabeleņus, Misters stuosta, ka 2016. godā ar kolegim uzastuojuši Rēzeknē i sasapazynuši ar tī aktivū hip-hop apvīneibu “Ausmeņa Records”, kuo rezultatā rodusēs dūma, ka vajag kū ta radeit kūpā. Tai i nu vīnys idejis balleitē vyss saguojs ar rezultatu dzīsmē “Reģioni”. Poša dzīsme topuse, kod, braukojūt ar koncertim pa Latveju, secynuots, ka ļauds regionūs ir atvārtuoki, sirsneiguoki komunikacejā, deļ tuo ari regionus sasagribiejs eipaši izceļt kaidā dzīsmē.

Reizē ar albumu apvīneiba izsludynuojuse deveņu koncertu sereju vysā Latvejā – diveji koncerti byus Latgolā: 13. aprelī “Misters & Nospiedumi” koncertēs Rēzeknē, Ausmeņa Kebabs, bet 14. aprelī Daugovpilī, Artilerejis Pogrobūs. Itymā mienesī, 23. februarī, īcarāts koncerts Reigā, Kaņepes Kultūras centrā, kurymā pīsadaleis ari Ūga.

Albumu “Nospiedumi” var nūsaklauseit straumiešonys servisā Spotify ej.uz/nospiedumispotify
Vaira par apvīneibu: misters.lv i facebook.com/mistersmm.

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]