Sovvaļnīks vinila platis formatā izdevs albumu “Napaseitynuots”, kuru kompaktdiska formatā izdeve 2016. goda nūgalē. Platē īkļautys 10 nu 13 kompaktdiska versejā asūšajom dzīsmem. Itei plate teik skaiteita par pyrmū myusu dīnu latgalīšu muzykys vinila plati – sovulaik vinila platēs tyka izdūta viņ latgalīšu tautys muzyka.

Albums “Napaseitynuots” ir veļteits Annai Rancānei i turpynoj Sovvaļnīka aizsuoktū stilu – kotrā albumā veidot dialogu storp muzyku i kaida nu latgalīšu dzejnīku tekstim. 2010. godā Sovvaļnīks izdeve albumu “Bolts susātivs”, kuru veļteja Ontona Kūkoja atcerei. 2009. godā izdūtajā albumā “Sūpluok” īkļauti desmit latgalīšu dzejnīku (V. Lukaševičs, L. Rundāne, O. Seiksts, M. Andžāne) teksti. Ja albumam “Sūpluok” beja rakstureiga muzykali melanholiska i vīgla roka apdare, tod ar kotru nuokušū īrokstu skanejums drupeit mainuos, tys klivs smagnejuoks, balansejūt iz folkmuzykys i alternativuo roka rūbežim.

Albumā “Napaseitynuots” dzīsmis īraksteitys sadarbeibā ar Latvejā pazeistamim skaņu režisorim Gintu Lundbergu, Māri Brensonu, Eināru Lipski i Gintu Stankeviču. Īrokstā jam daleibu Sovvaļnīka grupys bīdri Māris Lovniks (gitara), Artūrs Meļnikovs (bass) i Vadims Meļuščenkovs (bungys), kai ari vairuoki vīsmuokslinīki – Māris Muktupāvels, Biruta Ozoliņa, Guntra Kuzmina, Mareks Gusāns, Pīters Daugulis.

Nu 20.marta vinilplate byut nūpierkama muzykys īrokstu veikalūs. Prezentacejis koncerts Reigā nūtiks 24. martā, sastdīņ, krūgā “Aptieka” (Mozuo Mīsnīku īla 1) 22.00, i 3.majā Daugovpilī – „Artilērijas Pagrabi”.