“Borowa MC” īdzīduojuse dzīsmi kūpā ar Normundu Rutuli
Ar pavasara atīšonu par sevi ar jaunu dzīsmi “Es tevi saucu” atguodynoj grupa “Borowa MC”. Jaunajā dzīsmē ir pīaicynuots Latvejā pazeistamais dzīduotuojs Normunds Rutulis.
Dzīsmis autori ir Aigars Ruņčis i Ingars Gusāns, pīdzīduojuma spāku sevī iznas Normunds Rutulis, i jū papyldynoj Guntrys Kuzminys samtainais bolss.
Reizē ar dzīsmis audio verseju publiskuota ari dzīsmis video verseja, kū ir fiļmiejuse Latgolys entuziastu grupa “Biļdis”. Klipa fiļmiešona šaļtim nūtykuse ekstremalūs laika apstuokļūs gon Reigā, gon Ūgrē, gon Ančupānūs, atkluoj Ingars Gusāns.
