Roksta autors: Latgolys entuziastu grupa “Biļdis”

Latgolys entuziastu grupys “Biļdis” veiduotais raidejums “Laika leigučuos” atsaver iz Rēzeknis nūvoda Rykovys i Drycānu kulturys nomu atteisteibys ceļu nu Latvejis naatkareibys atjaunuošonys leidz šudiņdīnai. Raidejuma veiduotuoji gastej Reigā pi filozofejis zynuotņu doktora, profesora, literaturys i muokslys zynuotnīka i daudzu Latgolai nūzeimeigu gruomotu i publikaceju autora Pītera Zeilis. Jis Latgolys vuordu īrakstejs na tikai Latvejis viesturē, bet patur tū sovā sirdī kotru dīnu. P. Zeile stuosta par sovim goradorbim, kas rodušīs laikā kūpš Latvejis naatkareibys atjaunuošonys, i ļaus īsavērt myusu dīnuos saraksteitajuos publikacejuos presē.

Latgolys kulturtelpys aktualitašu sadaļā “Laika leigučuos” gasteis Latvejis Republikys Saeimā, kur ituo gods 3. oktobrī nūtyka Pylsūneibys, migracejis i sabīdreibys salīdieteibys komisejis i Ilgtspiejeigys atteisteibys komisejis kūpsēde, kurymā apsprīde Latgolys sociali politiskūs vaicuojumus, redzispunktā – Kulturys ministrejis padareitais.

Raidejums “Laika leigučuos” taps ar Vaļsts regionaluos atteisteibys agenturys mierkprogramys “Regionalūs i vītejūs medeju atbolsta programa” apakšprogramys “Atbolsts sabīdriski nūzeimeigys žurnalistikys radeišonai medejūs Latgolys planavuošonys regionā” atbolstu.
Karteite – Pīters Zeile, publicitatis materials