Reigā ir Fraņča Trasuna i Jezupa Rancāna īlys

Reigā ir Fraņča Trasuna i Jezupa Rancāna īlys

Roksta autors: portals lakuga.lv

29. majā Reigys dūmis deputati 54. sēdē ar bolsuojumu atbaļsteja lāmumprojektus Neicgaļa īlys pūsmu puorsaukt par Fraņča Trasuna īlu i Jezupa Rancāna vordu pīškiert īlai bez nūsaukuma Kengarogā (vysys Reigys dūmis sēdis nūsaveramys škārsteiklā).

Bolsuojumā par Neicgaļa īlys pūsma puorsaukšonu par Fraņča Trasuna īlu 40 deputati beja par i 16 atsaturēja, pret nabeja nivīns. Debatēs i deputatu vaicuojumūs ziņuotuojam par sagataveitū lāmumprojektu deputati izcēle tū, ka Trasuns ar sovu īguļdejumu Latvejis vaļsts izveidē byutu peļnejs juo vuordā nūsaukt nūzeimeiguoku īlu ci īlys pūsmu. F. Trasuna īla niule ir nazcik symtus metru garais Neicgaļa īlys pūsmys nu Vītalvys i Sasku īlys krystceļu da Pīdrujis īlys, bet ar lelu adrešu skaitu (Trasuna vuords byus apritē). Atguodynuosim, ka F. Trasuna īla ir Rēzeknē i Rēzeknis nūvoda Maltā.

Sovutīs lāmums par Jezupa Rancāna īlys nūsaukuma pīškieršonu sēdē tyka pījimts bez debašu i vīnbaļseigi. Veiskupa Jezupa Rancāna (1886–1969) nūpalni Latvejis vaļstiskuma veiduošonā saistuos i ar 1917. gods Latgolys kongresu, i diplomatiskū dorbu Latvejis vaļsts pastuoviešonys pyrmajūs godūs, veidojūt lobvieleigu Rūmys pāvesta attīksmi, i dorbu Saeimā, suocūt nu 2. Saeimys leidz pat 4. Saeimys darbeibys puortraukšonai, parlamenta prīšksādātuoja bīdra omotā, trimdā Latvejis politiskūs parteju lideri jū pīzyna par Latvejis Vaļsts prezidenta vītys izpiļdeituoju.

Atguodynuosim, ka Rēzeknē laukums piļskolna pakuojē nūsaukts J. Rancāna vuordā, bet tī uzcaltajom ākom (“Zeimuļs”) adrese ir Krosta īla. Partū par taida laukuma nūsaukumu zyna ratais.

Print Friendly, PDF & Email

Kalenders

Dec
11
Pyr
all-day Tekstilmuokslys asociacejis muok... @ Kulturys piļs "Ziemeļblāzma"
Tekstilmuokslys asociacejis muok... @ Kulturys piļs "Ziemeļblāzma"
Dec 11 all-day
Tekstilmuokslys asociacejis muokslinīku dorbu izstuode "Vibrācija" @ Kulturys piļs "Ziemeļblāzma"
Pīsadola: Inta Amoliņa, Kristīne Andersone, Antra Augustinoviča, Jānis Bankovičs, Dina Baumane, Irisa Blumate, Ruta Bogustova, Kristīne Celmiņa, Andra Dīriņa, Rasa Grāmatiņa, Dace Grīnberga, Ilze Grīnberga, Hele, Inese Jakobi, Vija Jansone, Diāna Janušone, Līva Kaprāle, Maruta[...]
Dec
16
Sai
13:00 Ivara Matisova lekceja par Latgo... @ Rēzeknis Muokslys noms
Ivara Matisova lekceja par Latgo... @ Rēzeknis Muokslys noms
Dec 16 @ 13:00 – 14:30
Ivars Matisovs stuosteis par Latgolys urbanonimim – regiona piļsātu īlu nūsaukumim i tūs izmaiņom laika gaitā. Urbanonimi atspīgeļoj piļsātu geografiskū vidi, viesturiskū montuojumu i ideologiskūs izsluoņojumus.   Ivars Matisovs ir ploša profila geografs, kurs ir[...]