Rokstu sagataveja: portals lakuga.lv

Kas gods augusta beiguos lelus svātkus cīma dzeivuotuojim i gostim reikoj Vileks nūvoda Škilbānu pogosta Upīte. Ituo goda “Svātki Upītie” gaideis gon ar ūtrū Storptautyskū folkloras festivalu “Lipa kust”, gon folkloras kūpas “Upīte” jaunuo muzykas albuma “Ryugts” prezentaceju i treis Latvejas teatru, Nacionaluo teatra, Latvejas Leļu teatra i Dirty Deal Teatro, izruodem lelim i mozim. Kai ari itūgod svātkūs gaidoms styprūs skriejīņs, lelais svātku koncerts i bals ar grupom “Unknown Artists” i “Celinieks”. “Svātki Upītie” byus nu 22. augusta leidz 1. septembrim, informej Namaterialuos kulturas montuojuma centra “Upīte” direktors Andris Slišāns.

Upītes svātki itūgod suoksīs ar Zīmeļlatgolas II Storptautyskū folkloras festivalu “Lipa kust”, kura koncerti Upītie i Vilekī byus nu 22. leidz 24. augustam. Pyrmū reizi festivals “Lipa kust” nūtyka 2017. godā. Ituo goda festivalā pīsadaleis folkloras kūpa “Krynica” nu Bolkrīvejas, tradicionaluos muzykas klubs “Veseta” nu Leituovas, kai ari folkloras kūpa “Upīte”, bārnu folkloras kūpa “Upīte”, Upītes etnografiskais ansamblis, Škilbānu etnografiskais ansamblis, folkloras kūpa “Rekavas dzintars”, folkloras kūpa “Egle”, kapela “Adzele”, kapela “Paeglīte”, folkloras kūpa “Soldanī” i Saļņovas kapela. Festivala laikā byus gon daņču pasuokumi, gon uorzemu gostu koncerts, festivala lelais koncerts i zaļumbals. Festivala “Lipa kust” mierkis ir popularizēt tradicionaluos dejas i tūs dažuodeibu, aicynuot interesētīs par vītejū i cytu vaļstu folkloru, kai ari tradicionaluos kulturas nūtikšonuos arviņ vaira dasaisteit vītejū sabīdreibu. Ideja taiseit festivalu pyrma vairuoku godu roduos folkloras kūpas “Upīte” vadeituojim Andrim Slišānam i Ligitai Spridzānei gribiešonā redzēt doncojūšu Zīmeļlatgolu. Vysi folkloras festivala “Lipa kust” nūtykumi ir bez īejas moksas.

Zīmeļlatgolas folkloras festivala laikā sovu trešū muzykas albumu prezentēs vītejī – folkloras kūpa “Upīte”. Jaunajā kūpas albumā “Ryugts” dzierdamas 14 dzīsmes latgaliski, kuruos ir puormontuotas nu Upītes puses dzīduotuoju. Vysas albuma dzīsmes ir par mīlesteibu, par cereibu i preceibu laiku. Albuma īrokstā pīsadalejuši 14 folkloras kūpas dzīduotuoji i muzykanti, smejūt, ka albuma golvonuo dūma ir ar muzykas pavadejumu uzlobuot demografiskū situaceju vaļstī. Iz albuma prezentaceju folkloras kūpa “Upīte” aicynoj 23. augustā 20.00 Upītes Tautas nomā.

Par tradiceju augusta beiguos nūteikūšūs “Svātki Upītie” klivuse ari Latvejis teatru gasteišona ar dažaidom izruodem. Itymā godā lelus i mozus skateituojus gaida eipaši plota teatra izruožu programa, iz pīrūbežu atbraucūt gon Latvejis Nacionalajam teatrim gon Latvejis Leļu teatrim i Dirty Deal Teatro. 23. augustā 14.00 bārni ar vacuokim i vacvacuokim teik aicynuoti iz Latvejis Leļu teatra izruodi “Bruņinieks, kuram sāpēja zobi” (īejas moksa 1,00 €), 25. augustā 18.00 Upītie byus nūsaverama Latvejis Nacionaluo teatra izruode “Latvieši”, kurei tikū atzeita par teatra īprīškejuos sezonas goda izruodi mozajūs spēles laukumūs, (īejas moksa 3,50 €), bet 1. septembrī 15.00 i 17.00 byus Dirty Deal Teatro izruode “Piramīda” (īejas moksa 3,00 €).

“Svātki Upītie” nūtikšonas ar Zīmeļlatgolas II Storptautyskū folkloras festivalu “Lipa kust”, CD “Ryugts” prezentaceju i teatra izruodem reikoj Namaterialuos kulturas montuojuma centrs “Upīte” i folkloras kūpa “Upīte”, bet aktivitates atbolsta Vaļsts kulturkapitala fonds, Vaļsts kulturkapitala fonda Latgolas kulturas programa ar AS “Latvijas valsts meži” i Latgolas regiona atteisteibas agenturas atbolstu i Vileks nūvoda pošvaļdeiba.

Vaira par “Svātki Upītie” i Upītes cīma aktivitatem var izzynuot, sekojūt Namaterialuos kulturas montuojuma centram “Upīte” facebook.com/NKMCupite, kai ari temturam #UpītieDzeiveJauka.

Dzīsme “Lai zaļoj jauneiba” nu jaunuo albuma “Ryugts”.