Rudiņa nūskanis Marijis Dzeislys dzejā

Rudiņa nūskanis Marijis Dzeislys dzejā

Rokstu sagataveja: portals lakuga.lv

Latgalīšus vēļ aiz viņ mulsynoj nūslaipumainuo dzejneica ci mož dzejnīks, kas laiku pa laikam lakuga.lv redakcejai īsyuta sovu veikumu ar pseidonimu Marija Dzeisla. Dzejūļūs vysod atsaspīgeļoj latgaliskuos kulturys aktualitatis. Itū reizi dzejai cauri vejās dažaidys nūtikšonys rudinī.

Dzejis dīnys
Pi vīnys vītys
Kūžu saciersta dzejs
Tai vysod ir bejs
Odu i uordu
Odu i uordu
Bodu buordu
Nivīna vuorda

Aizmiersu tekstu
Daguoja sacerēt iz vītys
Siedieju sausajā atejā aiz pogosta kulturys noma
I dūmuoju – cik ite čūkstu pyrms mane
Cik mīlesteibu, sapynu, škieršonūs, sasatikšonu
Traktoristi, mehanizatori, operatori, bibliotekaris
Kūka dieli nūtreiti maigi kai zeidaiņa lytkys
Dreiži jau muna kuorta
Seiļukolna uobeļduorzā iz calma
Nūskaiteit dzeju
I miert

Nanūmyru
Tī augšā Poncija Pilats nūvylka cymdus, nūmozguoja rūkys
Aiztaiseja operacejis zālis durovys i aizguoja
Siedieju ašņa paļtī koridorā iz rotu, muosenis dzēre kopeju
Dakūde uobuļu maizi, vosorys beigys, kabači, ugūrči
Dreiži byus muna kuorta
Ierkškeižu vaiņukim bogotim i gladiolu puškim raibim
Školuotuoji tecenim vēļ īt iz mežu piec beceņu
Īsim iz bazneicu pasateikt Dīvam Tam Kungam
Par vēļ vīnu vuiceibu godu
Par vēļ vīnu īspieju nūtreit iuzys
– Skūluotuoj, tova maize ir svāta
Bolta i ceista kai nanūtraipeita būrtneicys lopa
Voi monitors tukšam LibreOffice failam
Nivīna vuorda

Skenieju babys jauneibys kartenis
Niu jei byus digitala i myužeiga kai elektreiba
Unuku pruotūs i feisbukā
Iz pīminekļa nazynuoju, kū raksteit
Ticeigs katuoļs
Voi tūmār katuole?
Pīraksteju sev iz T-krakla:
Digitals katuoļs

Beju aizmierss vysus vacūs latgaļu vuordus i laimeigi siedieju upis krostā
Latvani, eļkšni, dodzi, iudiņa syurinis, suņa būrkuoni, nabaškenis, greislis i cyta etnografeja
Atguoja eisziņa nu draudzis prāvesteņa
Asu tics jaudeigā spama listē kūpā ar vysom Šuosmuižys babom
Atguodoju, kai kopusvātkūs juos treisūšim bolsim dzīduoja
Kur muna cereiba, kur muna mīsa, kur vysa radeiba
Teicit kungu
Jumprova svāta
Jezus tu soldonais
Bazneickungs mane atnastuos cukerkys sabēre apdauzeitā muola pūdā
Babys steivim pierstim zīde svīksta maizis i rūtuoja ar apkoltušu skumbreju
Zalī zierneiši apleik apguozta studiņa bļūdai kai Saturna gradzyns, būrkuonu ripelis kai planetys
Salateni taidi poši kai Mone taiseja, lai jai myužeiga dusiešona
Var likt ari iz zīmys, tik juopakarsej iz guņs, nui, burkā
Bierneņ, nu kam tu naēd
Paēd bierneņ
Ryugts rudiņa smuords upis krostā
Aiznas iudini, aizleigoj zuolis iudinī
Rudiņs kai studiņs


Dzejis dīnuos
Tai i napalaide pi vuorda
Kas tu taids
Kaids tev sakars ar Dīvu
Skandynuoja vysaidus paņteņus
Veči siermi i jaunkuņdzis opolys
Raiņam itūgod ari vaira nikaidys viereibys
Tai paīt tī pīminekli
Tai paīt laiki
Te tu esi vysūs pasuokumūs, te tikai Boņukā
Gryuts, maule, tys muola valns
Par myuža īguļdejumu
Cikom kaids atrass kai sensaceju
I izviļks nu prūda kai pūdu
Ar vysu vardivku

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.

Print Friendly, PDF & Email