Roksta autors: portals lakuga.lv

Folklorys kūpa “Upīte” iz Juoņu laiku plānoj izdūt albumu “Padzīdam i …”. Tymā byus īkļautys 17 veiru dzīsmis, kurys 20. godu symta suokuos  dzīduotys niulinejuo Vileks nūvoda Upītis cīma apleicīnē, portalu lakuga.lv informej folklorys kūpys vadeituojs Andris Slišāns.

Folklorys kūpa “Upīte” jaunajam albuma brīduse gona ilgu laiku. “2009. godā beja meistardarbneicys, kuruos Ontons Slišāns prezentēja sovu savuoktū materialu ar veiru dzīsmem nu Upeitis apleicīnis, kurys dzīduotys 20. godu symta suokuos. I nu tuo laika pa golvu maisejuos dūma, ka koč kod myusim juos ir juoizdūd diskā,” stuosta Andris Slišāns.

Jaunajā albumā “Padzīdam i …” nu 2009. gods meistardarbneicys īkļautys 14 dzīsmis, bet puorejuos treis dzīsmis ari ir nu Ontona Slišāna vuokuma, i vysys albumā īkļautuos dzīsmis pīraksteitys 70. godu suokuos. Andris atzeimoj, ka dažys albuma dzīsmis ir vysā Latvejā zynomys, bet leluokuo daļa ir da šam nadzierdātys.

Folklorys kūpys dalinīki Kate i Dominiks albumā īkļautajom dzīsmem izveiduojuši apdaris, tai veidojūt tom jaunu redziejumu i skaniejumu. Vaicojūt, voi albums īgius postfolklorys skaniejumu, Andris soka: “Mes vaira koncentrejamīs iz tū, ka asam folklorys kūpa, melodejis nav maineitys, tikai pasnīgšonys manere. Mož kaids tū nūsauks par postfolkloru, bet mes iz tū nasatīcam. Tys ir jaunūs cylvāku redziejums par dzīsmem, lai jūs paaudzei juos patyktu.”

Dzīšmu īrokstūs pīsadalejuši folklorys kūpys “Upīte” draugi – Latvejā zynomi muziki, kai, Renārs Kaupers, Juoņs Starpcāns, Katrīna Dimanta, Arņs Slobožanins, Kristaps Rasimi i cyti. “Ka gribīs, lai albumu pamona, reizem napīteik, ka īrokstā ir lobys dzīsmis i vajag vēļ kaidu ūdzeņu. Popularu cylvāku pīsadaleišona ir myusu ūdzeņa,” soka folklorys kūpys vadeituojs.

Jaunū albumu plānuots izdūt pyrms Juoņu, folklorys kūpa ir īceriejuse ari tuo prezentaceju, nu cikom asūšuos situacejis deļ vēļ nav skaidreibys, kod i kai nūtiks albuma prezentaceja. Albuma izdūšonu atbaļstejuse Kulturys ministreja, Latvejis Nacionalais kulturys centrs i Vaļsts kulturkapitala fonds.