Tautys muzykantu saīts i daņču vokors Rogovkā “Večerinka “O, bļaka!””
Rokstu sagataveja: portals lakuga.lv
18. julī Rēzeknis nūvoda Rogovkā nūtiks IX Tautys muzykantu saīts i daņču vokors “Večerinka “O, bļaka!””.
Pasuokumā “Večerinka “O, bļaka!””pīsadaleis virkne muokslinīku i kolektivu nu dažaidu Latgolys vītu i Reigys. Ar dzīsmem prīcēs taidi muzykanti kai Pīters Bilinskis i Ansis Ataols Bērziņš, uzastuos Drycānu kapela Andra Eriņa vadeibā, Viļakys nūvoda folklorys kūpa “Upīte”, Ludzys tautys noma ansambli “Kruževa” i “Krinica” i c. Īeeja pasuokumā byus bezmoksys.
Vuords “bļaka” latgaliski nūzeimoj “skuorda lūksne”, pa kuru uzsytūt, skaņa ir tuoli dzieržama. Izsaucīņs “O, bļaka!” rodīs kūpeigys muziciešonys laikā Ontona Kūkoja dzymtajā sātā, kur bļaka tyka izmontuota kai muzykys instruments, pa tū uzsytūt ar pagali. Piec Ontona Kūkoja aizīšonys myužeibā Nautrānu pogosta puorvaļde īdybynova tradiceju reikuot tautys muzykantu saītu ar Ontona Kūkoja dūtū nūsaukumu “Večerinka “O, bļaka!””.
