Koncertprograma “Muns Sorgeņgeļ” skanēs Latgolā i Reigā

Koncertprograma “Muns Sorgeņgeļ” skanēs Latgolā i Reigā

Rokstu sagataveja: portals lakuga.lv

Septembrī i oktobrī Latgolys dīvnomūs i Reigā skanēs romantiska koncertprograma “Muns Sorgeņgeļ”, informej bīdreibys “Mulino dell’arte” puorstuove Inita Malnača.

Latgolā dzymušuos muokslineicys – varganiste Ilona Birģele i mecosoprans Ilona Bagele – kūpā ar čellisti Initu Malnaču veiduos muzykalu tyltu storp četru dažaidu paaudžu komponistim, kuri dzymuši Latgolā i kuru dailradē nūzeimeiga vīta ir Latgolys temai. Programā tiks pīduovuota muzyka nu latvīšu muzykys klasiķa Juoņa Ivanova leidz pat myusdīnu jaunuos paaudzis dzīsmineicys Guntrys Kuzminys-Juknys skaņdorbim. Itamā koncertprogramā muokslineicys atskaņuos gon opusus, kas originalā raksteiti varganem, bolsam, čellam, gon dažaidu opusu puorlykumus itam sastuovam.

Ilona Bagele ir Latvejis Nacionaluos operys soliste i vīna nu pīpraseituokūs koncertmuokslineicu Latvejā i aiz juos rūbežim ar vierīneigu pīredzi akademiskajā, džeza i popularajā muzykā.

Varganiste Ilona Birģele regulari muzicej Reigys Dūmā, Latvejis regionu dīvnomūs i daudzvīt uorpus Latvejis, atskaņojūt eili solo programu. Muokslineica sasadorboj ar korim i īvārojamim solistim, ir Latvejis Viesturiskūs vargaņu svātku idejis autore i organizatore.

Inita Malnača pīsadola vysaidūs kamermuzykys projektūs, saadorboj ar īvārojamim solistim i instrumentalistim.

Programā skanēs Juoņa Ivanova, Romualda Jermaka, Riharda Dubrys, Andreja Selicka, Ilonys Rupainis i Guntrys Kuzminys-Juknys muzyka.

Koncertprograma “Muns Sorgeņgeļ” skanēs:

11. septembrī pļkst. 19.00 – Leiksnys Vyssvātuos Jezus Sirds Rūmys katuoļu bazneicā,

25. septembrī pļkst. 18.00 – Preiļu Rūmys katuoļu draudzis bazneicā,

1. oktobrī pļkst. 20.00 – Reigys Svātuos Marijis Magdalenys katuoļu bazneicā,

4. oktobrī pļkst. 12.00 – Viļakys Vyssvātuokys Jezus Sirds Rūmys katuoļu bazneicā.

Īeja koncertūs par zīduojumim bazneicu i vargaņu uzturiešonai.

Koncerti nūtiks, īvārojūt vaļstī nūteiktūs puļciešonuos īrūbežuojumus.

Print Friendly, PDF & Email

Nūtikšonu kalendars