Rokstu sagataveja: portals lakuga.lv

28. aprelī 18.00 stuņdēs Jāzepa Vītola Latvejis Muzykys akademejis (JVLMA) Lelajā zālē nūtiks tīšsaistis koncerts “Komponists Jānis Ivanovs un pianists Juris Kalnciems”, kurymā JVLMA Klavīru katedrys vadeituojs, prof. Juris Kalnciems atskaņuos muzikali augstvierteigū, ratai klausomū J. Ivanova cyklu “24 skicējumi klavierēm”, viestej JVLMA sātyslopa.

Komponists J. Ivanovs (1906–1983) itū cyklu komponēja laikā nu 1966. da 1972. gods. “Skicējumi” tyka komponāti i laisti klajā pa grupom, jī izreiz īinteresēja atskaņuotuojus i klauseituojus ar sovom spylgtajom tematiskajom idejom, ar kupli disonantuos harmonejis i linearuos atteisteibys kontrastim, ar decentralizātuos tonalitatis kruosu spēlem i latvīšu klavīrmuzykai tūšaļt vēļ naīrostim pianistiskuos fakturys pajiemīnim. Savaldzynuoja ari ar originalajim skaņu tālim – romantiskim sovā tīšajā emocionalitatē i laikmeteigim muzykys volūdā. Itys klavīrminiaturu kruojums kaidā šaļtī puorauga īcerē jū pabeigt kai 24 miniaturu kūpu vysuos tonalitatēs.

Koncerts nūtiks J. Ivanova 115 godu zeimē Latvejā. Koncerta tīšraide byus nūsaverama JVLMA “Youtube” kanalā.

Natuoli nu Preilim 1906. goda 9. oktobrī dzymušais komponists J. Ivanovs ir palics par Latvejis kulturys kanonu. Juo simfonejis i skiciejumi viestej par Latgolys dobu i cylvāka puordzeivuojumim, sarežgeitim dvēselis i gora konfliktim, komponista dorbi teik skaiteiti par vīnu nu zynomuokūs latvīšu simfoniskuos muzykys paraugu – ar sovu novatorismu, nu reizē ari skumeigu lirismu, kas vys vēļ dzeivoj vītejā folklorā. J. Ivanovs ir komponists, kurs saceriejs 21 simfoneju i lics pamatus latvīšu kompozicejis školai, bejs profesors Latvejis Vaļsts konservatorejā, struoduojs Latvejis Radiofonā kai skaņu režisors, bejs simfoniskuo orkestra dirigents, Latvejis Radejis raidejumu i televizejis komitejis muokslinīciskais vadeituojs, kai ari sajiems naskaitomys premejis.