Rokstu sagataveja: portals lakuga.lv

Nautrānu pogosta puorvaļde izsludynoj Jaunūs literatu konkursu, veļteitu Pītera Jurciņa 89 godu pīmiņai, lai gūdynuotu izcyluo nūvadnīka, dzejnīka pīmiņu i atjaunuotu jau 2005. godā aizsuoktū konkursa tradiceju, informej Nautrānu sporta hallis-kulturys noma vadeituoja Inga Vigule.

Pyrmuo “Pīterdīna Rogovkā” nūtyka 2004. goda 29. junī, sasadorbojūt ar Lauku biblioteku atbolsta fondu i kinorežisoru Juoni Streiču, i aptvēre na tikai Latgolu, bet ari cytus Latvejis nūvodus. Tī beja svātki, kurūs ar dzejis lasejumim pīsadaleja īvārojami latvīšu dzejnīki.

Jaunūs literatu konkursssuocēs nu 2005. gods, lai veicynuotu dzejis i prozys atteisteibu (eipaši latgalīšu volūdā). Tymā ir pīsadalejuši 39 jaunī literati nu septeņu Latvejis nūvodu, nu jūs 17 dzejnīki. Jaunuokajam konkursantam beja viņ 11 godi. Puors godus konkurss nabeja nūtics.

Itūgod konkursa moto ir  Pītera Jurciņa vuordi: “Tu tymsumam par speiti/ nes sovu gaismekleiti.” 

Konkursā var pīsadaleit kotrys, kurs ir pīrakstejs nūlykumam atbylstūšu, vēļ napublicātu dorbu  latgalīšu volūdā. Dorbi tiks vārtāti pīcuos nominacejuos: dzeja, proza, skečs voi vīncielīņs, bārnu literatura i latgaliskūs vierteibu paruodeišona sevkura dailliteraturys žanra dorbā. Konkursam dorbi juoatsyuta leidz 31. majam (īskaitūt) pa postu (“Pagastmāja”, Rogovka, Nautrēnu pagasts, Rēzeknes novads, LV-4652, ar nūruodi “Jaunūs literatu konkursam”) voi elektroniski (iz e-postu: inga.vigule@rezeknesnovads.lv ), nūruodūt  autora vuordu, uzvuordu, telefona numeri, adresu, nūsadorbuošonu.

Konkursa laureatu apbolvuošona nūtiks 2021. goda 29. juņa pasuokumā “Pīterdīna Rogovkā” Rēzeknis nūvoda Nautrānu pogostā. Kotrys nominacejis laureats sajims naudys premeju 100 eiro apmārā, kai arī byus specbolva nu LVLKŠA par bārnu prozu latgalīšu volūdā. Seikuoka informaceja nūlykumā, skaiteit ITE.