Parkū Daugovpiļs var tapt par kolorituokū Eiropys kulturys golvyspiļsātu?

Parkū Daugovpiļs var tapt par kolorituokū Eiropys kulturys golvyspiļsātu?

Sagataveja: portals lakuga.lv

Pīktdiņ, 18. junī, 13.00–14.30 stuņdēs nūtiks sabīdryskūs organizaceju iniciāta tīšsaistis diskuseja “Parkū Daugovpiļs var palikt par kolorituokū Eiropys kulturys golvyspiļsātu?”, kuramā vysaidu jūmu puorstuovi aicynuoti daleitīs puordūmuos par Daugovpiļs izaicynuojumim, kandidejūt iz Eiropys kulturys golvyspiļsātys titulu, kai ari diskutēt par ituo titula nūzeimeigumu Daugovpiļs i Latgolys tuoluokajā izaugsmē. Diskusejai varēs sekuot “Daugavpils 2027” “Facebook.com” kontā. Diskuseja nūtiks latvīšu, krīvu i latgalīšu volūdā, informej Eiropys kulturys golvyspiļsātys dasacejuma izstruodis dorba grupys koordinatore Diāna Soldāne.

Diskusejā pīsadaleis Daugovpiļs Marka Rotko muokslys centra vadeituojs, muokslinīks Māris Čačka, Latgolys viestnīceibys GORS muokslinīciskuos i pasuokumu nūdalis vadeituoja i komponiste Ilona Rupaine, Daugovpiļs teatra vaļdis lūceklis, režisors Oļegs Šapošņikovs,  SIA “Annvil.lv” vadeituoja Anna Bates, bīdreibys “New East” puorstuovs Joren Dobkiewicz i Daugovpiļs Eiropys kulturys golvyspiļsātys dasacejuma izstruodis dorba grupys koordinatore Diāna Soldāne. Diskuseju vadeis etnomuzikis i Latvejis Radejis raidejuma “Kolnasāta” vadeituojs Ēriks Zeps.

Daugovpiļs sadarbeibā ar Rēzekni i vysu Latgolys regionu ir padavuse dasacejumu konkursā, kab īgiutu Eiropys kulturys golvyspiļsātys 2027 titulu. Cikom nūteik gataveišonuos dasacejuma aizstuoviešonai žurejis prīškā, bīdreibys “Dienvidlatgales NVO atbalsta centrs” i “New East” aicynoj iz diskuseju vysaidu jūmu puorstuovus, kab nūskaidruotu, kas tik unikals i eipašs ir Daugovpilei i Latgolai, kū varim pīduovuot vysai Eiropai, kaidi ir Daugovpiļs i Latgolys izaicynuojumi ceļā iz itū titulu i kū kandidiešonys process dūs piļsātys i regiona īdzeivuotuojim.

Diskuseju reikoj Dīnvydlatgolys NVO atbolsta centrs i bīdreiba “New East” sadarbeibā ar Daugovpiļs piļsātys dūmi, Daugovpiļs piļsātys dūmis Kulturys puorvaļdi i “Europe Direct” Austrumlatgolys centru.

Print Friendly, PDF & Email

Kalenders

Feb
29
Cat
all-day Evijis Styrnys gleznu izstuode “... @ Rēzeknis Centraluo biblioteka
Evijis Styrnys gleznu izstuode “... @ Rēzeknis Centraluo biblioteka
Feb 29 all-day
Mādz saceit, ka dzeive ir sapyns. Izstuodē ir vārojamys gleznys akvareļu tehnikā, kuru var skaiteit par eipaši pīmāruotu sapynu atspaitu radeišonai. Akvareļu kruosys ar sovu plyustūšū caurspeideigumu ļaun mums īsajust sapynu pasaulī, kur vysu dzeivūs[...]