Da 10. februara var īsyuteit dorbus Naaizmērstulei veļteitam jaunradis konkursam

Da 10. februara var īsyuteit dorbus Naaizmērstulei veļteitam jaunradis konkursam

Rokstu sagataveja: portals lakuga.lv

Aglyunys vydsškola jau 15. godu reikoj pedagogei i rakstneicai Naaizmērstulei (Rozalejai Tabinei) veļteitu jaunradis dorbu i ilustraceju konkursu Latgolys lauku školu audzieknim. Itūgod konkursa tēma ir “Lobi dorbi var byut leli un mozi” (Naaizmērstule). Školāni teik aicynuoti īsapazeit ar Naaizmērstulis literarajim dorbim i piec jūs motivim atkluot sovys dūmys, puordzeivuojumus sovūs jaunradis dorbūs i ilustracejuos, viesteits Preiļu nūvoda sātyslopā.

Dalinīku aizdavums pīraksteit sevkura žanra jaunradis dorbu atbylstūši tēmai, izalosūt dorbam sovu viersrokstu. Dorba apjūms – da diveju A4 formata lopu datorrokstā. Dorba volūda – latvīšu ci latgalīšu volūda. Školuotuoja-konsultanta aizdavums – elektroniski īsyuteit jaunradis dorbus da 2022. gods 10. februara, sevkura školāna dorbu (vuords, uzvuords, klase) pīvīnojūt kai atsevišķu “Word” dokumentu iz e-posta adresi: monika.pusnakova@inbox.lv.

Ci ari – izzeimēt iz A4 lopys ilustraceju (tehnika piec izvēlis) atbylstūši konkursa tēmai, lopys ūtramā pusē nūruodeit ilustracejis autoru, klasi, školu, školuotuoju-konsultantu. Ilustraceju originalu syutūt pa postu (posta zeimūgs 10. februars), iz adresi: Daugovpiļs īla 6, Aglyuna, Preiļu nūvods, LV-5304 ci atdūt Aglyunys vydsškolys lītvedeibā.

Lobuokī dorbi, dorbu fragmenti (piec žurejis īskotim) konkursa nūslāguma pasuokumā tiks nūlaseiti i izlykti izstuodē. Dorbus apkūpuos jaunradis dorbu žurnalā. Lobuokūs dorbu autori tiks uzaicynuoti iz apbolvuošonu konkursa nūslāguma pasuokumā kluotīnē 2022. gods 10. martā  12.30 stuņdēs Aglyunys vydsškolā ci ari nūtiks attuolynuoti.

Naaizmērstule dzymuse 1890. gods 28. oktobrī Rēzeknis nūvoda Bieržgola pogosta Vackubulovā, struoduojuse par školuotuoju Jezufinovys Moļu muižys školā, piec tam ari školuos Bolvūs, Somersetā, Mežinīkūs, Aulejā i Aglyunā. Naaizmērstule beja pīticeiga i pošaizlīdzeiga, kolpuoja Dīvam i cylvākim. Apsazynojūt, ka bārnim tymā laikā datryuka satureigys losomvīlys, jei suoce vuokt teikys i puosokys, tulkuot cytu autoru dorbus. Naaizmērstule raksteja puosokys, dzeju, teikys, nūstuostus i stuostus kristeiguos moralis gorā. Sovūs dorbūs rakstneica izcēle patriotismu, dasadyure kasdīniškom lauku cylvāku dzeivis problemom, stuostūs i puosokuos parosti īlyka dzeivis gudreibys i pavuiceibys. Naaizmērstulis dorbi ir apkūpuoti kruojumūs “Lauku zīdi” (1934) i “Dīva dōrza pučeites” (1934). Pazeistamuokais nu Naaizmērstulis patriotiskūs dorbu ir rakstneicys pyrmais publicātais dzejūļs prozā “Tu manis navaicoj! (avīze “Dryva”, 1913. g. 21. numurs).

Konkursa nūlykums ITE.

Print Friendly, PDF & Email

Nūtikšonu kalendars

Jun
7
Tre
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Jun 7 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]
Jun
8
Cat
19:00 Izruode “Mantojums” @ Dirty Deal teatro
Izruode “Mantojums” @ Dirty Deal teatro
Jun 8 @ 19:00 – 20:30
“Mantojums” baļsteits dzejneicys i dramaturgis Annys Belkovskys personeigajā stuostā par jū i juos tāvu, partū muokslineica gryb skateituojus iz izruodi aicynuot ar itaidu viesti: “Kod pyrma diveju godu kūpā ar Jāni i Viesturu suocem dorbu[...]
Jun
9
Pīk
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Jun 9 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]