Rokstu sagataveja: portals lakuga.lv

5. augusts Jaunmūku pilī Tukuma nūvodā byus eistyn latgalisks, partū ka iz kulturys i garšu svātkim Kūrzemē sabrauks gosti nu Latgolys. Byus Bolvu nūvoda Baļtinovys pogosta teatris “Palādas”, muzykanti nu Rēzeknis nūvoda Gaigolovys pogosta Rasma i Gunārs Igauni, taipoš ari vītejī amatnīki i tierguotuoji. Naiztikt ari bez latgaliskom garšom i Latgolai tradicionalīm iedīnim.

Latgaliskūs nūtikšonu Jaunmūku pilī inciatore ir muzeja kruojuma globuotuoja, nu dzimšonys baļtinavīte – Ingrīda Vistopola. “Pasuokuma organiziešona eisti nav muns amplua, i muzeja kruojuma globuotuoja pīnuokumūs tys ari nav vydā, tok maņ pošai itys ir svareigi, i prīca, ka munu ideju atbaļsteja ari vadeiba. Es vodu ari ekskursejis, taipoš ari 5. augustā byus vareiba izstaiguot Jaunmūku pili kūpā ar mani ekskursejā latgalīšu volūdā.” Ingrīda ari stuosta, ka Jaunmūku pilī i Tukuma nūvodā kūpumā ar Latgolu i latgalīšim saisteibys praktiski nav, viņ tik daudz, cik jei poša, deļtam itys pasuokums ir zynoms izaicynuojums, vys, ka ļaudim patiks i pasuokums byus apmaklāts, varātu ari iz prīšku dūmuot par leidzeigom aktivitatem.

5. augusta dīnys parāds:

• 14–20 Vokortiergs, kurā tyvuoki i tuoluoki amatnīki i sātā ražuotuoji byus savaduši sovus taiseitūs prīškmatus i gordumus.
• 14–23 Nūtikšonys gostim byus vareiba nūbaudeit “Latgolys garšys” aba tradicionalūs Latgolys iedīņus, tymā vydā asuškys, buļbu blīnus i c.
• 15 Apmaklātuojus ar kūrzemnīku gostu gaideišonys i dzeivis prīcu sagaideis piļs ļauds, sovpus ar ļusteigu daņci īprīcynuos Tukuma E. Birznieka-Upīša 1. pamatškolys deju kolektivs “Pastariņi”.
• 16 Ekskurseja latgalīšu voldūdā gida pavadeibā Jaunmūku pilī ar vareibu dazynuot piļs viesturi, stuostus i nūslāpumus (daleibys moksa 3,00 EUR/pers.).
• 18 Dīnys golvonuo nūtikšona – Baļtinovys dramatiskuo kolektiva “Palādas” Danskovītis izruode “Ontans i Anne” 5. daļa “Ontans i plāšnīki”. Pi Annys i Ontana gostūs īsarūn Annys dāla saimis draugi – lauluots puors nu Reigys. Ontans jiut, ka sātā suoc nūtikt vysaiduokys čudnys lītys. Izaruod, ka atbraukušuo gaška ir plāšneica i ekstrasense. Beletu cena īprīškpuordūšonā – 5 EUR, pasuokuma dīnā – 7 EUR. 
• 21 Balle ar muzykantim nu Gaigalovys. Beletu cena īprīškpuordūšonā – 5 EUR, pasuokuma dīnā – 7 EUR. 

Jaunmūku piļs komanda aicynoj sevkuru iz Latgolys kulturys, prīcys i kūpeibys gora pīpiļdeitu dīnu!