Rokstu sagataveja: portals lakuga.lv

Itymā rudinī Upītē, Daugovpilī, Lūznovā i Atašīnē bīdreiba “Danču krātuve” i bīdreiba “Baltfolk” sadarbeibā ar bīdreibu “Skaņumāja” reikoj  bezmoksys tradicionaluos dejis i muzykys meistarklasis, kab dziļuok īsavuiceit tradiceju. 

Meistarklasēs, kurys organizej bīdreibys “Danču krātuve” vadeituojs Sandis Zučiks i LU deju folklorys kūpys “Dandari” muokslinīcyskuo vadeituoja Inga Dūka, daleibnīki teik īpazeistynuoti ar latvīšu tradicionalū deju, eipašu viereibu pīgrīžūt doncuotuoju prasmu uzlobuošonai – stuojai, leidzsvoram, rūku i kuoju pozicejom i komunikacejai puora vydā. Nūdarbeibuos teik vuiceiti ari dejis pamati, veicynuota improvizaceja i jaunrade. Deju nūdarbeibys veļteitys latvīšu divdaleigajom puoru dejom, kadriļom i rūtaļom.

Ostonis meistarklasis nūteik sadarbeibā ar folklorys kūpom “Vīraksne” (Jākubpiļs nūvoda Atašīnē), “Svātra” (Daugovpilī), “Upīte” (Bolvu nūvoda Upītē) i kadriļu deju grupu “Lūznovys kadriļs” (Rēzeknis nūvoda Lūznovā). Bīdreibys “Danču krātuve” vadeituojs i meistarklašu organizators Sandis Zučiks par sadarbeibu ar taišni itom Latgolys folklorys kūpom stuosta: “Kab īdzeivynuotu meistarklasis, mums beja svareigi, ka kūpys, ar kurom kūpā eistynuot projektu, na tikai dzīd i spielej, bet ari doncoj. Ar Upītis folklorys kūpu i “Svātru” jau ilguoku laiku mums ir izaveidojuse sadarbeiba, taipat ar “Vīraksni” mes pādejūs godūs asam pietejuši i īmyužynuojuši video formatā taišni Atašīnis daņčus. Sovpus ar Lūznovu nav bejuse tik lela sadarbeiba, tok mes bīži asam bejuši gostūs iz Kadriļu nakti i gribiejom sovys zynuošonys par kadriļom nūdūt tuoļuok.” Sandis ari atzeimej, – ka byus vareiba iz prīšku turpynuot vadeit itaidys meistarklasis, jis lobpruot struoduotu ari ar cytom kūpom, kurom byutu gribiešona vuiceitīs kūpā. “Īsavuiceit jaunys prasmis taišni dzeivajā tradicejā ir cīši svareigi.” 

Divejis nūdarbeibys Upītē i Daugovpilī jau ir aizvadeitys, i meistarklašu vadeituoja Inga Dūka pīzeist, ka tūs apmekliejums bejs cīši lobs: “Pa munam, kotra nūdarbeiba da šam ir izadavuse. Upītē nūdarbeiba beja sirsneiga, pīsadaleja vysi – mozī bārni, jaunīši i pīaugušī. Sovpus “Svātrai” ir breineigi doncuotuoji, kas azartiski īsasaisteja kai rūtaļuos, tai ari veikli īsavuiceja kadrilis. Cīši patyka jūs paviļkšona iz zūba i humors.” Inga ari pībiļst, ka iz itaidom nūdarbeibom ir vārts braukt vēļ i vēļ, partū ka tamuos na tikai teik dūts, bet ari sajimts preteimā. “Iz sātu braucu smaideidama. Latgola deļ mane nūzeimej atvārtus i azartiskus cylvākus.”

Sovpus bīdreibys “Skaņumāja” vadeituos meistarklasis byus kai muzykalys ekskursejis, kuruos daleibnīki tiks īpazeistynuoti ar senejim i jaunuoku laiku instrumentim daņču spieļuošonai. Bīdreibys puorstuovi Sandra Lipska i Ilmārs Pumpurs pastuosteis par muzykys instrumentu lītuošonu myusu dīnuos i paguotnē. 

Meistarklasis nūtiks da 8. decembra, tok jau itū svātdiņ, 12. oktobrī, 13 stuņdēs vysi teik aicynuoti iz Atašīni, kur vuiceitīs latvīšu tradicionaluos rūtalis varēs ar nūdarbeibu vadeituojom Ingu Dūku i Madaru Lūku, kai ari folklorys kūpu “Vīraksne”. Meistarklase nūtiks Atašīnis tautys nomā “Annys sāta”. Reikuotuoji aicynoj leidza jimt ārtus apovus i prīceigu gorastuovūkli.