Rokstu sagataveja: portals lakuga.lv

Nu 22. da 25. oktobra Viļņā jau četrpadsmytū reizi nūtiks Storptautyskais baltistu kongress. Tymā itūgod ari latgalistikys vaicuojumim veļteita sekceja “Latgalīšu volūda i cyti baltu volūdu regionalī varianti: multidisciplinari rysynuojumi i pietnīceibys perspektivys”.

Storptautyskais baltistu kongress ir zynuotniskys pasuokums, kas nu 1964. goda ik piec pīcu godu puļcej baltu volūdu pietnīkus Viļņā voi Reigā. 2025. godā tys nūtiks jau 14. reizi i teik reikuots Viļnis Universitatē. Kongresu veiduos vyspuoreiguo sekceja i tematiskuos sekcejis. Kongresa atkluošonys plenarsēdē 22. oktobrī ar prīšklasejumu par senejim latgalīšu tekstim, tūs pietnīceibys motivaceju, olūtim i metodem uzastuos Oduma Mickeviča Poznanis Universitatis profesore Nikole Naua (Nicole Nau).

Sovpus pīktdiņ, 24. oktobrī, nūtiks tematiskuo sekceja “Latgalīšu volūda i cyti baltu volūdu regionalī varianti: multidisciplinari rysynuojumi i pietnīceibys perspektivys”, kuru organizej RTU Rēzeknis akademejis pietneicys Sanita Martena, Antra Kļavinska i Angelika Juško-Štekele. Sekcejā tyka aicynuoti pīsasaceit pietnīki, kuru interesis ir saisteitys kai ar latgalīšu volūdu, tai ar cytim baltu volūdu regionalajim variantim.

Konferences programā īkļauti referati kai par senejim latgalīšu rokstu olūtim, tai par myusu dīnuos radeitim digitalim latgalīšu volūdys resursim i reikim i ar tim saisteitim vaicuojumim, taipat ari ar latgalīšu volūdys lītuojumu saimēs saisteiti pietejumi:

• Anna Stafecka “Izloksne un tradīcija 19. gadsimta vidus latgaliešu rakstu avotā “Nutikszonas Biblias..” (1860)”
• Anna Vulāne “Ieskats valodniecības terminu lietojumā Antona Skrindas darbā “Latwìšu wolúdas gramatika”
• Lidija Leikuma “Par pīterpilīšu raksteibu latgalīšu volūdys normiešonys koņtekstā”
• Ilga Šuplinska “Latgalīšu volūdys tezaurs – spēles ar nozīmēm – darbības vārda dzeit gadījuma analīze”
• Angelika Juško-Štekele, Sandis Laime “Metodiskas pieejas meklējumi digitalizēto latgaliešu folkloras kolekciju normalizēšanai”
• Antra Kļavinska “Vietvārdu Rīga, Daugavpils un Rēzekne diskursīvie modeļi: Mūsdienu latgaliešu runas korpusa datu analīze”
• Piotr Grablunas “Daugiakalbystė Latgaloje. Šeima, mokykla ir „gatvė“ kaip daugiakalbystės praktiką palaikantys faktoriai – kelių naratyvinių pasakojimų ir kalbinių biografijų ištraukų nagrinėjimas”
• Sanita Martena ““Muni radinīki dzeivoj Dagdā, bet viņi visi latviski runā” – latgaliešu valoda un citi latviešu valodas reģionālie varianti latviešu diasporas stāstos”
• Ieva Ozola “Latgalistikas dotumi Liepājā: saturs un pētniecības iespējas”

Konferencis dorba volūda ir latvīšu, leitovīšu i angļu. Vaira informacejis par kongresu var atrast ite.