Rokstu sagataveja: portals lakuga.lv

Rēzeknis nūvoda Lūznovys muiža ar Maltys apvīneibys puorvaļdis atbolstu i sadarbeibā ar latgalīšu kulturys kusteibu “Volūda” turpynoj pārņ veiksmeigi aizsuoktū i izsludynoj 2026. gods rodūšūs rezidenču programu literaturā, volūdnīceibā i Latgolys pietnīceibā. Jamā niu jau sešim autorim voi rodūšajom apvīneibom byus vareiba izmontuot rezidenci, rodūt dorbus, kas veicynuos latgalīšu volūdys, literaturys i latgalistikys atteisteibu i populariziešonu.

Rezidenču programa dūmuota latgaliski rokstūšim literatim, tulkuotuojim, žurnalistim, scenaristim, latgalīšu volūdys, literaturys i Latgolys kulturys pietnīkim, jūs vydā ari uorzemu literatim, kas roksta latgaliski, voi uorzemu literatim i pietnīkim, kas roksta ap Latgolu, pietej Latgolys kulturu voi tulkoj nu/iz latgalīšu volūdu, kai i cytom rodūšajom personeibom, kas dorbojās latgaliskajā kulturtelpā. Programys mierkis ir veicynuot latgalīšu volūdys, literaturys i latgalistikys atteisteibu i populariziešonu, nūdrūsynojūt platformu augstvierteigu daildorbu latgalīšu volūdā i Latgolai veļteitu pietejumu pīaugumam.

2025. gods rezidenču programu izmontuoja pīci interesenti: literate Dagneja struoduoja pi ūtruo dzejūļu kruojuma “Mīleibys volūdā” – redicencis laikā kai raksteiti jauni dzejūli, tai struoduots pi jau da ituo pīraksteitūs, konkursa “Latgolys prozys skaitejumi 2024” uzvarātuoja Inga Kaļva-Minina rezidencis laikā pabeiguse garstuostu bārnim latgaliski “Sirdsbolss” i pīrakstejuse apceri, latgaliskuo dzejis slama “Rogovkys dzejis voga” uzvarātuojs Silvestrs struoduojs pi debejis dzejis kruojuma “Lāčus plēst un velnus raut”, tulkuotuojs Laurs Magazeiņs rezidencis laikā gatavejs myusu dīnu ukraiņu literaturys autora Artema Čeha dorba “D rajons” fragmentu tulkuojumu latgaliski, bet muziks Ingars Gusāns (Sovvaļnīks) struoduojs ar muzykys materialu jaunajam albumam “Cārtumi”.

Kai piec rezidencis pīzyna Dagneja, jai byušona Lūznovys muižā beja vareiba puormeit vidi i vaira dūmuot ap rodūšū dorbu. “Gasteju rezidencē, kab pabyutu klusumā ar sevi, dobu, baudeitu atmosferu i dabuotu īdviesmi, kai i salyktu iz papeira tū, kas ir vydspusē. Kam kasdīnā ir daudz cytu dorbu, sāta i saime i gryuši tai mudri atsaslēgt nu vysa, kab sadzierdātu sovu vydabolsu. Kab pīraksteitu eisai, vajag vaira laika,” tai Dagneja raksturoj sovu motivaceju.

Leidza ar Vaļsts kulturkapitala fonda atbolstu, 2026. gods programā byus vareiba nūdrūsynuot jau sešu rezidentu uzaturiešonu i rodūšū dorbu Lūznovys muižā. Taipat kai pārņ divejis rezidentu vītys ir rezervātys pārnejuo gods publiskūs latgalīšu literaturai veļteitūs konkursu “Latgolys prozys skaitejumi” i latgaliskuo dzejis slama “Rogovkys dzejis voga” uzvarātuojim, bet četri rezidenču dalinīki byus zynomi publiski pasludynuotā rezidenču programys konkursā. 2026. gods rezidencem interesenti var dasasaceit da 9. februara, syutūt eisu motivacejis viestuli i plānuotuo rodūšuo dorba īvierzi (da 2000 zeimu) iz muiza@luznava.lv. Vēļ vīns ituo gods jaunums ir uzaturiešonys garums – tys niu byus 14 dīnu (divejis nedelis). Rezidenču programa latgalīšu literaturā, volūdnīceibā i Latgolys pietnīceibā paradz dalinīka uzaturiešonys (naktsvīta, ādynuošona) i rodūšuos darbeibys (stipendeja (15 eiro/dīnā apmārā)) izdavumu segšonu.

Rezidencis dalinīku aizdavums ir pusgoda laikā piec rezidencis nūslāguma sagataveit publikaceju (literarū dorbu, juo fragmentu, dzejūļu kūpu, rokstu voi cytu dorbu sovā nūzarē) latgalīšu kulturys ziņu portalam lakuga.lv, veicynojūt rodūšuo dorba daīmameibu plotuokai sabīdreibai i latgalīšu rokstu volūdys i Latgolai veļteitys tematikys populariziešonu. Atkareibā nu rezidenta interešu i gribiešonys, īprīšk sarunojūt, muiža pīduovoj vareibu nūdrūsynuot rodūšuos darbneicys, sasatikšonys ar kūpīnu, autorvokora nūtikšonu, īkļaunūt jū muižys kulturys pasuokumu programā rezidencis nūslāgumā voi cytā laikā da atteiceiguo kalendaruo gods gola.

Programa paredz, ka reizē muižā var uzaturēt diveji rezidenču dalinīki, par rodūšuo dorba periodu īprīšk vīnojūtīs ar Lūznovys muižu. Rezidenču programys nūtikšonai finansiali tolkā īt Vaļsts kulturkapitala fonds, Rēzeknis nūvoda pošvaļdeiba i latgalīšu kulturys kusteiba “Volūda”. Plotuoka informaceja par dasasaceišonu i rezidencem ITE. 

Pārnejā godā Lūznovys muiža svieteja 10 godu nu attaiseišonys piec leluos atjaunuošonys 2015. gods pavasarī, i aizsuoktuo rezidenču programa latgalīšu literaturā, volūdnīceibā i Latgolys pietnīceibā ir vīna nu jaunūs iniciativu, ar kū muiža īsuoce ūtrū dorbu desmitgadi. Bet latgalīšu kulturys kusteiba “Volūda” 2025. gods novembrī nūsvieteja sovu juridiskū 20 godu pastuoviešonu, i vīns nu bīdreibys darbeibys vierzīņu vysod bejuse literaruos jaunradis veicynuošona i latgalīšu volūdys populariziešona, deļtuo īsasaisteišona rezidenču programys nūdrūsynuošonā ir logiskys dorba turpynuošonys sūļs.