Rokstu sagataveja: portals lakuga.lv

Jau catūrtū godu piec kuortys Rēzeknis nūvoda Ūzulainis tautys noms aicynoj sevkuru interesentu dasaceit komandu da desmit cylvāku sastuovā i pīsadaleit “Čangaļu saītā ci latgalīšu olimpiadē”, itūreiz 27. februarī, viestej organizatoru sagataveituo informaceja.

Nu jau tradicionali latgaliski dūmojūšī ļauds teik aicynuoti sasalaseit, kab humora pylnā i draudzeigā atmosferā ļautūs kūpeigom ļustem, vareibai paasynuot pruotus i rysynuot vysaiduokus aizdavumus pasuokumā ar nūsaukumu “Catūrtais čangaļu saīts ci latgalīšu olimpiade” Rēzeknis nūvoda Ūzulainis tautys nomā.

Kai cytus godus īrosts, komandys, kas dasasaceis daleibai, sagaida vysaiduoki aizdavumi ap latgaliskū, tok organizatori pastreipoj, ka nav juosabeist i nu golvys juosavuica vysi latgalīšu volūdys gramatikys lykumi, partū ka aizdavumi byušūt cīši dažaidi, īkļaunūt ari taidus, kur byus vareiba sevi ospruoteigai pasnēgt i humoristiski izapaust. Golvonais pasuokuma mierkis asūt ļautīs kūpā byušonys prīcai i labi pavadeit laiku. Ar tū, kai olimpiadē veicēs pārņ, var īpasazeit portala lakuga.lv reportažā nu tuos.

Organizatori sūlej, ka ari itūreiz byus vareiba ļautīs vysaiduokim nūpītnim i mozuok nūpītnim puorbaudejumim, kur nūderēs i zynuošonys, i ospruoteiba i pats golvonais – prīca runout sovā dzymtajā latgalīšu volūdā. Ituo gods saīta i olimpiadis nūsaukums ir “Byusim kai strodi – vysod vīšņā”. Vīna nu organizatoru i Ūzulainis tautys noma vadeituoja Santa Ostaša stuosta: “Ituo gods olimpiadis nūsaukums ir humorpylns, divdūmeigs i ospruoteigs izteicīņs kai latvīšim, tai latgalīšim. Ka parūk dziļuok, tod tam ir vairuokys nūzeimis, i ari eistyn gorda pīgarša, jo kuram vys nagaršoj kirši? Taipoš itymā teicīnī var atrast ari nūruodi iz vīnu nu latgalīšu gramatikys pamatliciejim. Deļtam itys popularais i daudzveideigais teicīņs ir breineiga devize nūtikšonai, kam ļaun ar sevi spēlētīs vysaiduokuos izpausmēs. Dalinīkus viertēs Strodu žureja, prīcynuos dzīdūši stradeni i cyti breinumi!” Santa ari pastreipoj, ka strodim pateik vysaiduoki gordumi, tai ari itūreiz dalinīki teik aicynuoti īsarast ar sovim lobumim i latgaliskuos vyrtuvis šedevrim, kurūs kūpeigai varēs baudeit tradicionalajā “Čangaļu Lido”. Jei ari aicynoj sevkuru interesentu braukt gostūs, kab pošim vysu iz vītys redzēt, sajust i īsasaisteit!Iz olimpiadi aicynuoti ari skateituoji nu molys, kam kasgadeji gaidomi komandu prīšknasumi i ari skateituojim vysod ir vareiba īsasaisteit i izpiļdēt komandom pīduovuotūs aizdavumus. Itūreiz nūtikšonā byus ari eipašī gosti – Strodu žureja, kas viertēs komandu snāgumu, grupa “Jezups i Muosys”, folklorys kūpā “Andeļneicys” i skaneigais putneņš Mārtiņš Strods. Komandys var dasasaceit daleibai da 22. februara, vaira informacejis zvonūt 25127340. Olimpiadis nūlykums daīmams ITE.