Rokstu sagataveja: portals lakuga.lv

Itūreiz jaunajai nedeļai kulturys īsacejumus sagatavejuse Latvejis Kara muzeja kuratore i projektu vadeituoja Katrīna Kūkuoja. Jei īsoka apmeklēt izstuodis, sajust pavasari i pošam izadeit capuri.

Sāta

Tys ir magiskys vuords. Vysi zyna, kas ir sāta, bet kotram tei ir sova. Nu janvara beigu Kuorsovys kulturviesturis centrā “Līču mājas” ir apsaverama Ontona Kūkuoja 85 godu jubilejis izstuode “Sāta. Māju sajūta A. Kūkoja tekstos, gleznās un dzīvē”. Izstuodē O. Kūkuoja dorbi mejās ar Jura Soikāna Ludzys muokslys školys audziekņu veikumu muokslinīkam rakstureigajā pasteļu tehnikā. Izstuodi boguotynoj informativys planšetis, kas ļaun tyvuok īpazeit muokslinīka dzeivis guojumu i rodūšū montuojumu. Izstuodi organizej J. Soikāna Ludzys muokslys škola sadarbeibā ar bīdreibu “Teātris azotē”. Īīšona bez moksys.

Capure

Garuo, soltuo zīma lyka aizadūmuot par babys adeitajim cymdim, i tai viņ nīz rūkys pošai kū saadeit. Maņ pateik tai, ka var vīnā vokorā pabeigt īsuoktū, pīmāram, verūtīs olimpiskuos spēlis. Pajam gona rasnu dzeju, kas der 4.–5. izmāra odotom, izmat 80 vaļdzeņus ci kaļpeņus i tod odi garu cilindru tai, lai krītnai puori golvys vydam. Kod cilindrys gotovs, vīnam golam izver cauri dīgu i sasīn kūpā – izīt capure. Var nosuot i kai šali. Ka ir gribiešona, var vīnā golā vaļneiti izadeit ar labiskim-kreiliskim vaļdzenim, bet tys piec poša patikšonys. 

Pavasars

Gryuši tū īsadūmuot, tok Japuonā jau zīd kirši. Pasaulī ir suocīs pavasars, koč Latvejā snīga vēļ daudz. Tim, kuri grib dreižuok sajust pavasari, īsoku dūtīs iz muokslys muzeju “Rīgas birža”, kur nu 2026. gods 21. februara leidz 3. majam byus vareiba apsavērt izstuodi “Sniegs kūst. Japānas māksla”.