Rokstu sagataveja: portals lakuga.lv

Paruodūt sovu nūstuoju i izsokūt vīnuoteibu Ukrainys atbolstam ceiņā pret Krīvejis agreseju, jau catūrtū godu šudiņ, 24. februarī, 12 stuņdēs vaira nakai 60 Baļtejis medejūs skaņ Ukrainys himna. Latvejis medeju telpā itei akceja teik eistynuota jau catūrtū godu. Tamā pīsadola kai regionalī, tai nacionalī medeji, taipat ūtrū reizi akcejā īsasaista ari medeji Leitovā i Igaunejā, taidā veidā aplīcynojūt Baļtejis medeju solidaritati i vīnuoteibu atbolstā Ukrainai.

“Itys jau ir catūrtais gods, kod Latvejis medeji, i ūtrais, kod Leitovys i Igaunejis medeji, pauž vīnuotu nūstuoju pret Krīvejis izvārstū karu Ukrainā. Es turu nūceju, ka Baļtejis medeju solidaritate īdvasmuos sasalīdēt ari myusu sabīdreibu – turpynuot snēgt paleidzeibu Ukrainys dzeivuotuojim. Latvejis Sabīdryskais medejs vysus itūs godus konsekventi stuosta par kara realitati, tymā storpā nu froņtis lineju. Mes navarim nūgurt voi pīrast pi kara – Ukrainai myusu atbolsts byus vajadzeigs leidz pat uzvarai,” nūruoda Latvejis Sabīdryskuo medeja (LSM) golvonuo redaktore Anita Brauna.

Daleibu Ukrainys himnys atskaņuošonys akcejā apstyprynuojuši vaira nakai 58 medeji Latvejā, kai ari sabīdryskī medeji Leitovā i Igaunejā. Akcejā pīsadola: Latvijas Radio 1, Latvijas Radio 2, Latvijas Radio 3 – Klasika, Latvijas Radio 5, Latvijas Radio 6 – Naba, LTV1, LTV7, LSM.lv, Skonto, Skonto +, Radio Tev, LoungeFM, Chillax FM, SWH, SWH +, SWH Rock, SWH Spin, SWH LV, Eiropas Hitu radio, EHR SuperHiti, Latviešu Hiti, EHR Krievu Hiti, RetroFM, Kurzemes radio, Divu krastu radio, Radio “EF-EI”, Latgales radio, Jēkabpils Radio 1, ReTV, TV3, TV3 Life, TV6, TV3 PLUS, Star FM, Top radio, Alise Plus, Radio Marija, Radio Rēzekne, 360 TV, STV Pirmā, 8TV, Riga TV 24, TV 4, Delfi.lv, Rus.Delfi.lv, TVNET.lv, Apollo.lv, RUSTVNET.lv, Rockradio.lv, lakuga.lv, Latvijas Vēstnesis, Dzirkstele, Ziemeļlatvija, Jūrmala TV, Vidusdaugavas TV, LRT RADIJAS, LRT OPUS, LRT KLASIKA, Delfi.lt, Delfi TV, Vikerraadio, Klassikaraadio, Raadio Tallinn, Kuku Raadio, kai ari Reigys storptautyskuo autoūsta.

Taipat LSM sadarbeibā ar Ziedot.lv eistynoj akceju, aicynojūt sabīdreibu zīduot Ukrainys dzeivuotuoju atbolstam laikā, kod Krīvejis uzbrukumu deļ izpūsteituo energetikys infrastruktura daudzvīt pamatuse cylvākus bez apkuris, elektreibys i guņs. Sazīduotī leidzekli tiks nūvierzeiti generatoru, elektreibys i apkuris nūdrūsynuošonai kūpīnom, kurom tys steidzami ir napīcīšams, ļaunūt sasiļdeit patversmis, izvuoreit iudiņa, pagataveit sylta iedīņa i atgrīzt gaismys vītuos, kur itūšaļt volda tymsa.

Zīduot var, zvonūt pa telefonu 90204113 (moksa par zvonu – 5 eiro), voi tīšsaistē ITE. Labdareibys organizaceja Ziedot.lv sasadorboj ar Ukrainys Energetikys fondu, i sazīduotī leidzekli pylnā apmārā tiks nūvierzeiti ituos akcejis mierkam. Atbolsts aktivs da 25. februara.