Rokstu sagataveja: portals lakuga.lv

26. martā nūsaukti Latvejis Literaturys goda bolvys (LaLiGaBa) nominanti i specialbolvu sajiemieji. Nominantu vydā ari Ligijis Purinašys dzejprozys kruojums “Magnificat” i Jūlijis Tumanovskys nu jaunnorvegu volūdys latgaliski iztulkuotuo Juna Fosis luga “Kaids nūteikti atīs”.

Februara suokuos bolvys ekspertu komiseja paviesteja nominātūs autoru i dorbu “garū sarokstu”, kai ari nūsauce Myuža bolvys sajiemieju – tulkuotuoju Jāni Krastiņu. Niu zynomi ari gola nominanti, kai ari specialbolvys sajiemiejs – žurnals “Jaunā Gaita”.

Itūreiz Latvejis Literaturys goda bolva tiks padūta ostoņuos nominacejuos: lobuokais dzejis autordorbs latvīšu volūdā; lobuokais prozys autordorbs latvīšu volūdā; lobuokais literaturys autordorbs bārnim latvīšu volūdā; lobuokais prozys tulkuojums latvīšu volūdā; lobuokais atdzejuojums latvīšu volūdā; spūdruokuo debeja literaturā latvīšu volūdā; spūdruokais dorbs dramaturgejā; spūdruokais dorbs literaturys pietnīceibā. Ligijis Purinašys gruomota “Magnificat” izvierzeita lobuokuo dzejis autordorba kategorejā, bet Jūlijis Tumanovskys tulkuotuo Juna Fosis luga “Kaids nūteikti atīs” – lobuokuo prozys tulkuojuma. Obejis gruomotys izdavuse Volūdu sāta. Vysu nominantu sarokstu var atrast ITE.

Ligijis Purinašys kruojumu “Magnificat” veidoj pīcys dalis, kuruos apsavārtys sīvītis attīceibys ar buozšonuos viersā pīredzi, ar dzymtū vītu, ar dzymdynuotuojim i cylvākim sūpluok, ar romantiskū partneri i gols golā ar sevi eistyn eksistencialā leiminī, apsazynojūt i pījamūt tū, ka “es” var tyvuotīs “cytam/cytim” tik da nūteikta rūbeža, kurū škārsojūt “es” vystik palīk vīns. Idejiskū kruojuma dziļumu i dzejis volūdys īdarbeibu pastyprynoj dzejprozys forma, kū īdvasmuojuse lyugšonu stilistika, kai ari smolkais, unikalais poetismys, kaids rakstureigs Ligijai Purinašai. Nūsaukums “Magnificat” īt nu latiņu volūdā puorcalta slavynuojuma Jaunovai Marijai, atsasaucūt iz tekstūs izmontuotū lyugšonu stilistiku, kas saplyudynuota ar aktualom temom i kū spūdrai atainoj kruojumā īkļautuos muokslinīka Raivja Nikolajeva originalilustracejis. Kruojumu veidoj dzejproza latvīšu literarajā i latgalīšu rokstu volūdā. Ingys Gedžūnis recenzeju par “Magnificat” var puorskaiteit ITE.

Jūlija Tumanovska latgaliski puortulkuojuse Nobela premejis laureata literaturā Juna Fosis lugu “Kaids nūteikti atīs”, kas jau pyrma tuos izdūšonys gruomotā pīdzeivuojuse ari pyrmizruodi Daugovpiļs teatrī. Autors roksta jaunnorvegu volūdā, kas, leidzeigai kai latgalīšu volūda Latvejā, Norvegejā ir mozuok lītuotuo volūda. Sugestejūšā, poetiskā, tok reizē nasamuoksluotā volūdā luga viereibys centrā izlīk eksistensialys temys, par pīmāru, mīlesteibu, greizsirdeibu, atsvešynuoteibu, vīnpateibu i ticeibu. Izdavumu papyldynoj četri roksti: par Junu Fosi i lugu, latgalīšu teatri, Fosi Latvejā, kai ari jaunnorvegu volūdu kai skotivis volūdu. Interveju ar Jūliju Tumanovsku var puorskaiteit ITE.

Itūgod bolvys žurejā dorbojās ekspertu komisejis prīšksādātuoja, tulkuotuoja, publiciste i redaktore Ieva Lešinska; literaturzynuotnīks, literaturys kritiks i muzeja darbinīks Arnis Koroševskis; dzejnīks i atdzejuotuojs Edvards Kuks; rakstneica Kristīne Ulberga; dzejnīks, rakstnīks i daudzmuokslinīks Raibīs; autore i tulkuotuoja Signe Viška; filozofe i publiciste Sofija Anna Kozlova.

Latvejis Literaturys goda bolvys padūšonys ceremoneja nūtiks 17. aprelī 19 stuņdēs Reigys Centraltierga galis paviļjonā, atbolstūt īceri tyvuokajūs godūs Galis paviļjonu pīlāguot muokslys i kulturys funkcejom. Itūgod bolvu padūšonys ceremoneja telpiski i muokslinīcyski veiduota sadarbeibā ar jaunīšu dzejis i muzykys pasuokumu “Dzejas pusnakts”.

Pyrma laureatu apbolvuošonys ceremonejis nūtiks LaLiGaBa nominantu skaitejumi – 1. aprelī 18 stuņdēs bārā “Aleponija” (Ernesta Birznieka-Upīša īla 22, Reiga) nūtiks nominantu dzejis skaitejumi, sovutīs 9. aprelī 18 stuņdēs Latvejis Nacionaluo rakstnīceibys i muzykys muzeja mansardā (Mārstaļu īla 6, Reiga) sasatiks prozaiki i prozys tulkuotuoji. Itūs pasuokumus apmeklēt aicynuoti vysi interesenti.