Rokstu sagataveja: portals lakuga.lv

Latgalīšu hiphopa muzykys puorstuove Ūga, sasadorbojūt ar mārgu trio “Juos īluos līluos”, izdavuse singlu i videoklipu “Pikachu”. Tys nav tipiskys hiphopa standartim atbylstūšs skaņdorbs – itūreiz Ūga kūpā ar sovu muzykys producentu Nikitu Grappu papyldynuojuši dzīsmi ar bluza garšu i drupeit avangardisku pīsitīni.

Kompoziceja viestej par vysim labi zynomū attīceibu karuseli. Par naizbāgamajim pakuopīnim i aizagiušonom, kū kasdīnā juopīdzeivoj kotram puoram. Skaņdorbs ir par realu, šaļtim kairynojūšu, vystik skaistu mīlesteibu.

“Vaira jau nav nikaids nūslāpums, ka maņ kai jaunradi veidojūšai muokslineicai sovys sferys lauceņā pateik ik pa laikam pasarūtaļuot ar muzykys žanru. Tymā vaicuojumā maņ paleidz kolegs Nikita Grapps, kurs vysod ir atvārts trokom i svaigom idejom. Sadarbeiba ar “Juos īluos līluos” roda jaunu skaniejumu sevkurai kūpā radeitai dzīsmei. Es saceišu – tys deļ klauseituoja byus svaigs gaiss, kū īelpuot. Lai “Pikachu” tuoli i labi skaņ!” izasoka poša Ūga.

Videoklips itūreiz ir symtprocenteigai pošu mārgu dorbs. Klipu nūfiļmēja vīna nu mārgu trio dalineicu – Amanda Lapa. Vyss process bejs vaira par lobu laika pavadeišonu i organiskom emocejom, na styngrim kadriejuma plānim. Fiļmiešona nūtyka mieginuojuma dīnā, eisai pyrms uzastuošonys itepat, Latgolā. Pošys muzikis skaita, ka rezultatā ir saguojs video, kas nav puoruok sapucāts, nūtūnāts, bet ir eists i pylns ar dzeivu, nadamīgtu energeju.