Roksta autore: Agnese Skangale

Nu 29. juļa da 2. augusta Bolvu nūvodā i Modūnis nūvoda Borkovā nūtyka pīktais storptautyskais folklorys festivals “Lipa kust”. Itūgod tymā pīsadaleja kai gosti nu Reigys, Pūlejis i Indejis, tai vītejī Zīmeļlatgolys kolektivi. Portals lakuga.lv apmeklēja festivala nūslāguma koncertu 2. augustā Upītē.

30. julī Bolvu Kulturys i atpyutys centrā nūtyka festivala “Lipa kust” atkluošonys koncerts, sovutīs nuokušajuos dīnuos, 31. julī i 1. augustā, – “Styprūs skriejīņs” i vairuoki koncerti – aizlyugums Viļakys katuoļu bazneicā par izcylū Zīmeļlatgolys teicieju Margaritu Šakinu, kam sekuoja juos 100 godu jubilejai veļteits koncerts, i izbraukums iz Modūnis nūvoda Borkovu, kas kuplynuoja 25. Tautys muzykantu svātkus. Festivala nūslāguma koncerts nūtyka 2. augustā pi Namaterialuos kulturys montuojuma centra “Upīte”.

Iz vaicuojumu, kai roduos ideja par festivalu “Lipa kust”, tuo golvonais organizators, Bolvu nūvoda Namaterialuos kulturys montuojuma centra “Upīte” direktors i folklorys kūpys “Upīte” vadeituojs Andris Slišāns atsoka: “Tys beja seņ – 2017. godā. Beja tai, ka mes, folklorys kūpa “Upīte”, suocem braukt iz uorzemu festivalim. Sajutom, ka uorzemēs ir daudz foršuoki festivali nakai Latvejā. Te ir vairuok statiski – 10 voi 15 minuti uzastuoj i vyss, festivals tev beidzīs. Uorzemēs uzsvors ir iz draudzeibu. Prūtams, koncerts ari svareigs, bet puorsvorā sadraudzeiba ir uzsvors – sasadzīduošona, sadoncuošona. Tai ari izdūmovom, ka mums vajag taidu festivalu kai “Lipa kust”.” 

Storptautyskū festivalu “Lipa kust” ar sovu byušonu kluotyn pagūdynuoja gosti nu uorzemu – Pūlejis folklorys kūpa “Perła Warmii” i kūpa nu Indejis “Lok Nach”. Latvejis tradicionālū kulturu puorstuovēja bārnu i jaunīšu folklorys kūpys “Upīte”, folklorys kūpa “Ilžeņa”, kapela “Paeglīte”, kapela “Rekavas stīgotāji”. 

“Gostim nu Pūlejis i Indejis cīši pateik byut ite, festivalā. Kotrā festivalā kotri gosti vysod ir sacejuši, ka jim ite pateik,” stuosta festivala idejis autors i vīns nu organizatoru Andris Slišāns. “Pījimsim, Indejis kūpa saceja, ka jim cīši pateik i myusu kuorteiba, i vīsmīleiba, i atmosfera, kas ir ite. Sovutīs Pūlejis puorstuovi nav vaci, bet jī jau nu pīcu godu vacuma braukoj iz taida veida festivalim. Itūgod jī jau ir paspiejuši byut Makedonejā i vysur cytur. Kaidūs desmit festivalūs eistyn ir paspiejuši pabyut, bet saceja, ka itys ir lobuokais, kur jī ir bejuši. Festivals i mes poši labi augam, i augt varātu vēļ. Vaira grybātu dabuot atbaļsteituojus naudenis ziņā. Ka byutu vēļ drupeit vaira naudenis, tod varātu vysu kū vierīneigu nūorganizēt.”

Fotogalerejā kartenis nu festivala nūslāguma koncerta. Foto: Agnese Skangale