Roksta autore: Laura Spundere, portals lakuga.lv

Septembrī, kod apleik daudzi vysaiduoka veida dzejis nūtikšonu, portals lakuga.lv izalaseja pagasteit mozuok zynomā vītā – Rēzeknis Pīlāguotuos literaturys bibliotekā–informacejis centrā. Ite 11. septembrī ar sovu tekstu skaitejumim uzastuoja dzejis meiļuotuoju publikai vysā naseņ īpazeita personeiba – Silvestrs Solovjevs.

Interesanti, ka koč ari oficialuo Storptautyskuo dzejis dīna ir 21. martā, Latvejā septembris i rudiņs ir tradicionalais dzejis laiks. Dzejis dīnu aizsuokumi vaicojami vēļ padūmu okupacejis laikūs, kod 1965. godā nūtyka pyrmuos Dzejis dīnys, kas beja saisteitys ar Raiņa 100. jubileju 11. septembrī i juo myužeibā nūīšonys datumu – 1929. gods 12. septembri. Nu tūs laiku ir sasaglobuojuse tradiceja, ka taišni septembrī vysaktivuok nūteik dzejis prīšklasejumi, teik atkluotys jaunys gruomotys, nūteik vysaida veida saīšonys i koncerti ci vyss par i ap dzeju.

Silvestrs ir saleidzynojūši jauns vuords dzejis pasaulī. Uzvariejs 2024. gods latgaliskajā dzejis slamā “Rogovkys dzejis voga”, ir ceļā iz sovu pyrmū dzejūļu kruojumu i pa šaļtei pīsadola kaiduos publiskuos nūtikšonuos. Vēļ Silvestrs ir Latvejis Radejis latgaliskuo raidejuma “Kolnasāta” rubrikys “Muzykys žvyrs” leidzautors i raidīroksta “Metālkāsts” autors.

Pyrma vairuoku godu Silvestrs, lācūt ar izpletni, pīdzeivuojs nalaimis gadejumu, juo sovā ziņā natycamū izagluobšonys stuostu var nūsaklauseit Latvejis Radejis raidejumā “Dokumentārijs”, tok ar tū jis dalejuos ari ar Pīlāguotuos literaturys bibliotekys apmaklātuojim. Silvestrs sovus tekstus skaiteja latgaliski, tok pīraksteiti tī teik latvīšu literarajā volūdā. Juo tekstūs sasavyn fantazeja i sapynu pasauļs, leidz ar dziļom emocejom i spūdrim tālim. Koč ari Silvestra teksti ir vysā dryumi, tymūs sajiutamys atsaucis iz nūceju i lobom puormaiņom. Bibliotekys apmaklātuoji giva kotru vuordu, ar interesi klausejuos. Piečuok ari īsasaisteja sarunā, aizdeve vaicuojumus. Tū eistyn nav reali apraksteit, tik sajust i redzēt iz vītys, tok apmaklātuoju vydā vaļdeja taida vīgla, sirsneiga humora dava, gaiša dzeivis prīca.

Kaidys vareibys pīduovoj Pīlāguotuos literaturys biblioteka–informacejis centrys?

Latgolys regionā ir treis pīlāguotuos literaturys bibliotekys – Bolvūs, Rēzeknē i Daugovpilī. Rēzeknis Pīlāguotuos literaturys bibliotekys–informacejis centram ir ap 500 klientu nu gondreiž vysa Latgolys regiona. Tī ir ļauds, kuri biblioteku apmeklej poši ci ar atbolsta personys paleidzeibu, taipoš ir īspieja sajimt pīlāguotū literaturu pa postu voi izmontojūt biblioteku attuolynuotai, ir ari ļauds, kuri kasdīnā uzatur socialuos apryupis īstuodēs. Pa vydu tam īstuode sasadorboj ar vysom Rēzeknis nūvoda bibliotekom, ļaunūt skaiteituojim sajimt pīlāguotuos bibliotekys pakolpuojumus, asūt tyvuok dzeivis vītai.

Centra vadeituoja Ināra Zeltiņa myusus izvad caur pasauli, kuru kasdīnā, dzeivojūt itepat, Rēzeknis nūvodā, saīt sastapt reši ci nimoz. Jei paruoda, kai izaver gruomotys Braila rokstā – ka saleidzynuot, tod vīna līta ir gruomota parostā rokstā, pīmāram, vīnā siejumā, tok ka jū puornas iz Braila rokstu, saīt jau septeni siejumi. Pīmāram, Sūzenys Kolinsys gruomota “Balāde par dziedātājputniem un čūskām” – kab izjimt itū gruomotu Braila rokstā, cylvākam iz biblioteku juoīt ar mugursūmu. Ināra stuosta, ka ar kotru godu cylvāku, kuri skaita Braila rokstā, palīk vys mozuok. Parosti skaita tī, kuri vuicuos Reigys Strozdumuižys vydsškolā-atteisteibys centrā. Niu cylvāki ar redzis trauciejumim vaira izalosa gruomotys audio formatā.

“Mums vīna jauna meitine, kura aktivi īsasaista vysaiduos nūtikšonuos, roksta ari dzeju. Kod jei uzastuoj i skaita sovus tekstus, jei tū mudri dora Braila rokstā,” stuosta Ināra. Ka cylvāks sātā grybātu nazkū pīraksteit Braila rokstā, tys ari ir īspiejams, i tam ir specials reiks – irbuleits ci grifele, ar kuru īspīž punkteņus, i Braila roksta rama, kurā nūstyprynoj papeiru. Taipoš ir ari Braila rokstommašyna i Braila printers. “Bibliotekā piec pīprasejuma sagatavejam laseituojim napīcīšamū informaceju Braila rokstā. Vysubīžuok tī ir vuiceibu materiali studentim ar redzis problemom i informaceja nu škārsteikla resursu. Par pīmāru, mums ir apmaklātuoja, kura interesejās par smoguo metala muzykys grupom,” doluos Ināra.

Izjamūt Braila roksta gruomotys, Pīlāguotuos literaturys bibliotekā ir daīmams ari teksta–runys laseituojs jeb OCR (optiskuo rokstzeimu atpazeišona). Ar itū īreici var nūskenēt sevkuru drukuotu izdavumu i puorvērst tekstu digitalā formatā. Ar sintezis bolsa paleidzeibu īreice varēs tekstu bolsā nūskaiteit. Ināra stuosta, ka teksti, prūtams, naskaņ pavysam dabeigi, tok var labi saprast. Naredzeigom i vuojredzeigom personom nu septeņu godu vacuma, kurom itys tehniskais paleigleidzeklis vajadzeigs izgleiteibys dabuošonai ci dorbam, ar vaļsts atbolstu taidu īreici var sajimt ari sev sātys lītuošonai, tī gon ir vīnreizeja īmoksa, tok tei nav vysā lela – 7,11 eiro.

Bibliotekā ir vareiba izmontuot taktilū datora displeju (Braila ryndu) – īreici, kurā Braila rokstā var nūlaseit tekstu, kas radzams monitorā, izmontojūt datoru ar skanis programu, taipoš ir īreicis teksta palelynuošonai.

Vēļ Pīlāguotuos literaturys bibliotekā ir daīmamys ari gruomotys ar leluoku burtizmāru cylvākim ar vuojredzeibu, ari gruomotys vīglajā volūdā. Taipoš ir vysaiduoka veida audio gruomotys, kurys ir daīmamys diskūs, tok cylvāks var atīt ar sovu zibatmiņu i bibliotekys darbinīki paleidzēs salikt praseitūs materialus.

Ka cylvāks ir Pīlāguotuos literaturys bibliotekys klients ar skaiteišonys gryuteibom, jis var attuolynuotai nu sātys dabuot vysys audio gruomotys. Taipoš Latvejis Naredzeigūs bibliotekai ir sovs YouTube konts, kur bezmoksys daīmami vysaidu gruomotu audio īskaņuojumi. Ināra stuosta, ka itūšaļt ir vysā daudzi audio gruomotu latvīšu volūdā, cikom latgaliski nav vyspuor. Sovpus, runojūt par fiziskom gruomotom, cikom kas Braila rokstā latgaliski ir daīmama tikai Annelis Slišānis gruomota “100 deči Latvijai”. Tamā paraleli pošam Braila rokstam ir ari taustomi deču/materialu gabaleni.

Vaicoju Inārai partū, kai nūteik gruomotu izdūšona Braila rokstā. Jei skaidroj “sistemu” – nu suoku vajadzātu dūtīs iz Latvejis Naredzeigūs biblioteku Reigā, caur kurim tod vysulobuok varēs saprast, kaidys ir gruomotu izdūšonys vareibys. Ari Pīlāguotuos literaturys biblioteka Rēzeknē sajam gruomotys nu Latvejis Naredzeigūs bibliotekys, kas ir tūs izdeviejs.

Pīlāguotuos literaturys bibliotekys darbinīki pa vydu gruomotu i materialu izsniegšonai ir ari drupeit psihologi i atbolsta personys, kam saskarsme ar kotru apmaklātuoju ir cīši individuala. “Cylvāks, kurs ir spiejeigs skaiteit parostā drukā, vysubīžuok pats var daīt pi plaukta i izavielēt kaidu gruomotu, tok apmaklātuojim ar redzis trauciejumim juopaleidz izavielēt, ir juopīduovoj gruomotys audio formatā, juozyna ari kotra interesis. Nareši ari kotru reizi sovam apmaklātuojam puorskaitom anotaceju, kab jis saprostu, parkū ir tei gruomota. Taipoš mes syutam gruomotys ari pa postu. Kūpumā ir apmāram 15 skaiteituoji, kuri gruomotys sajam syutejumu veidā. Tī ir ļauds Leivuonā, Preiļūs, Ludzā, Zylupē i cytvīt,” doluos Ināra.

Rēzeknē, Bukmuižys īlā 20, leidz ar Pīlāguotuos literaturys biblioteku atsarūn vēļ divejis īstuodis – Latvejis Naredzeigūs bīdreibys vītejuo organizaceja i Latvejis Naredzeigūs bīdreibys Rehabilitacejis centra filiale. Deļtam, kod cylvāks atīt iz centru, par pīmāru, vaicuot kaidu paleidzeibu Naredzeigūs bīdreibai, kotra īstuode var īpazeistynuot i pīduovuot sovus pakolpuojumus, kas tam cylvākam varātu byut nūdereigi.

“Ar laiku myusu apmaklātuoju lūks ir ari pasaplašynuojs. Ka suokumā mes bejom vārsti taišni iz cylvākim ar redzis trauciejumim, tod niu mums ir klienti ar vysa veida skaiteišonys gryuteibom. Pīmāram, cylvāki ar dislekseju, piec insulta, ar atteisteibys, uztveris, kusteibu i cytim funkcionalim trauciejumim. Taipoš ari seniori, kurim gryuši saredzēt parostū druku. Ari es itymā dorbā laiku pa laikam atkluoju nazkū jaunu, par pīmāru, nazynuoju, ka ari cylvākim ar migrenu ir gryuteibys skaiteit. Deļ migrenys cylvākam saplyust burtu riņdenis i jis navar palaseit, deļtuo jī izalosa audio gruomotys,” doluos Ināra.

Pīlāguotuos literaturys bibliotekā nūteik daudz tematiskūs pasuokumu i izstuožu, interesenti dūdās ekskursejuos. Septembrī bibliotekā apsaverama riezeknīša, bibliotekys laseituoja Roberta Līpenīša rodūšūs dorbu izstuode “Koks – radītspēks, dzīvesprieks”. Gleznys ir taiseitys nu nalelu kūka ripeņu, daīmamys ari taktilai apsavieršonai. Sovpus 25. septembrī tiks reikuots prīšklasejums “Uzzini klausoties!”, kurā bibliotekys darbineicys sagataveis i bolsā skaiteis vysaidus rokstus nu jaunuokūs presis izdavumu. Taidi prīšklasejumi nūteik kotru mienesi.

Rēzeknis Pīlāguotuos bibliotekys vadeituoja Ināra Zeltiņa sevkuru ituos publikacejis skaiteituoju aicynoj: “Varbyut jiusu paziņu lūkā kaidam ir gryuteibys skaiteit parostuos drukys gruomotys, tok cylvāks grib skaiteit. Pastuostit, lyudzu, par mums i vareibu laseit gruomotys vysaidūs formatūs – palelynuotā drukā, audio formatā, vīglajā volūdā i Braila rokstā.”