Kulturys īsacejumi nedeļai: izzynuot Latgolu car apjiemeigim uzjiemiejim, kulturvītom i iedīni
Rokstu sagataveja: portals lakuga.lv
Jau drupeit vaira nakai godu šokolada mīļuotuoji sevi var lutynuot ar Latgolā ražuotim gordumim – šokolada dražejom. Itūs soldonumus Bolvūs ražoj diveji apjiemeigi jaunīši Aleta i Niks, kas nūdybynuojuši i atteistej sovu uzjāmumu, kurū vēļ niu saucam par “&LaVersa Chocolate”, bet dreiži pazeisim kai “Versa Confectionery”. Jī itamā nedeļā aicynoj apbraukuot Latgolu i īpazeit tū car apjiemeigim uzjiemiejim, kulturvītom i iedīni.
“Divi Loki cafe” Bolvūs
Itei ir vīta, kur poši īsagrīžam regulari. Mums pateik, ka iedīņs nav standarta, bet vysod puordūmuots, interesants i gords, kai ari vysod mainuos, partū bīži ir kū jaunu paraudzeit. Atmosfera ir cīši muojeiga i napīspīsta, partū tei ir vīna nu vītu Bolvūs, kū poši lobpruot īsokom i cytim.
Laimis muzejs Indrā
Laimis muzejs mums atmiņā palics ar cīši syltu i īdvasmojūšu sajiutu. Saimineica atraktivai pastuosta kai par pošu vītu, tai par Indrys viesturi. Mums eipaši patyka tys, ka ite nav tik juosaver ekspoziceja – ari poši apmaklātuoji var īsasaisteit vysaiduos aktivitatēs. Mes, par pīmāru, sytom traukus “iz laimi” i veiduojom sovu aromatu maiseņu nu kaļtātūs augu. Vīta ir cīši šmuki īkuortuota, i nu tuos paceli eistyn aizbrauc drupeit laimeiguoks.
Kroma kolns Ondrupinis pusē
Kroma kolnā ir unikala vareiba iz šaļti īsajust senejūs latgaļu pasaulī, na tik puorskaiteit par tū muzeja ekspozicejā. Tī sataiseits 9.–13. godu symta latgaļu nūcītynuojuma atdarynuojums i piec īprīškejis dasasaceišonys ir vareiba apsavērt i pat pīmiereit senejūs apgierbu, rūtu i bruņuojuma rekonstrukcejis. Pa munam, taišni itaida dzeiva viesturis pīredze ir tys, kas itū vītu padora eipašu i atškireigu nu īrostūs apsavieršonys objektu.
“Kuotini” i Rekovys dziernovys Bolvu pusē
Breineigs variants ir aizbraukt ari iz zemnīku saimisteibu “Kuotini” (Kotiņi), vaira izzynuot par pošu saimisteibu i cylvākim, kas tū vysu ir izveiduojuši, piec tam īsagrīzt Rekovys dziernovuos paēst. Poši asam bejuši iz jūs eipašū sastdīnis pīduovuojumu – eistyn beja cīši gordai. Ari itū sastdiņ, 26. septembrī, jim otkon ir eipašais pīduovuojums, kurā teik izmontuoti pošu saimisteibā audzātī produkti. Cīši lobs veids, kai vīnā izbraucīnī i izzynuot kū jaunu, i labi paēst.
Komentari