Rokstu sagataveja: portals lakuga.lv

Pyrmūdiņ, 9. novembrī, iz puoru daņču meistarklasi pi “Lūznovys kadriļa” aicynoj latvīšu tradicionaluos horeografejis i muzykys meistarklašu “Dančmeistari” i tradicionaluos dejis školuotuojs, pietnīks, ari projekta “Danču krātuve” autors i izstruoduotuojs Sandis Zučiks. Jis sagatavejs kulturys īsacejumus itai nedeļai i īsoka apmeklēt na viņ daņčus Rēzeknis nūvoda Lūznovys muižā, bet ari nūbraukt da Daugovpilei.

“Kasdīnā padzilinuotai pieteju dejis tradicejis Latvejā nu vysaidu aspektu – kai vaicojūt atbiļdis iz tū, kur i kai juos cālušuos, tai analizejūt jūs atteisteibu i vītu myusu dīnu sabīdreibā,” soka Sandis Zučiks, kurs jau gondreiž desmit godu vaicoj, pietej, rekonstruej i īmyužynoj daņčus, kū apkūpoj škārsteikla sātyslopā dancukratuve.lv, tī daīmamys ari lekcejis, nūdarbeibys, intervejis ar ekspertim i, prūtams, poši daņči i muzyka. 

Cyklā “Dančmeistari” meistarklasis itymā rudinī puoru daņčūs i rūtaļuos jau nūtykušys Atašīnē i Upītē. Sovpus 9. novembrī Sandis Zučiks aicynoj sasatikt Lūznovys muižā, kur jis pasnēgs bezmoksys meistarklasis latvīšu puoru dejuos. Kai skaidroj Sandis, nūdarbeibys laikā dalinīkim byus vareiba padzilinuotai īsavuiceit latvīšu tradicionalūs puoru deju pamatus, eipašu viereibu dagrīžūt treis styurakminim: dejis viesturyskajai izceļsmei i kontekstam, tehniski precizai sūļu izpiļdei i pareizai stuojai, kas nūdrūsynoj harmonisku kontaktu doncuotuoju vydā. Pasuokums ir atvārts sevkuram interesentam naatkareigai nu īprīškejuos pīredzis. Ite vys juojam vārā, ka leidza juopajam doncuošonai ārta mainis abave i ārts apgierbs.

Tim puornūvadnīkim, kas piec daņču meistarklasis Latgolā plānoj pasakavēt ilguok i varbyut seņ nav bejuši ūtrajā leluokajā Latvejis piļsātā, Sandis Zučiks īsoka nūbraukt iz Daugovpili i īpazeit voi atsvaidzynuot zynuošonys regiona kulinarajā i kulturys montuojumā, apmeklejūt Šmakovkys muzeju, kas i itymā godā nūsvietejs sovu 10 godu jubileju. Ari vītejim tei ir vareiba izzynuot, kai veiduojīs, atsateistejs i puorsamejs itys tradicejom boguotais dzierīņs. 

Sovpus nedeļgolā, turpynojūt baudeit Latgolys kulturys dzeivi, tim, kam pateik teatris, Sandis Zučiks īsoka apmeklēt Daugovpils Kulturys pili, kur 13. novembrī 18 stuņdēs tiks izruodeita komedeja “Traki laba diena”. Režisora Dž. Dž. Džilindžera humora pylnais īstudiejums – britu dramaturga Donalda Čērčila komedeja “Traki laba diena” – īsavērs Anglejis augstuokuos sabīdreibys aizkulisēs i radeis breineigu jutūni deļ nedeļgola.

“Sasatiksim deju placī Lūznovā i piec tam jau Latgolys kulturys vītuos!” tai Sandis Zučiks.