Kab padareitu pasauli i cylvākus prīceiguokus i smaideiguokus, grupa „Bez PVN” šudiņ suokuse izplateit muzykalu narkotiku – dzīsmi „Zuoleite”, kas atrūnoma grupys ūtrajā albumā „Reits”, kurs publiskā prezentaceja tyka atruodeits juņa suokuos.

„Zuoleiti” tev atsyuteis poša grupa, kaids draugs, paziņa ci ari tei pi tevs tiks najaušā kuortā, bet tuoļuokuo lītuošonys instrukceja ir cīši vīnkuorša – juopadora dzīsmis zamoškīluodiešona datorā ci telefonā i juosaklausa vysur i vysu laiku, kab radzātu puormainis, ka vysi apleicejī suoc smaidēt vaira.

Dzīsmis „Zuoleite” vuordu i muzykys autors ir Kristaps Rasims, dzīsmis īroksts taiseits studejā „Reiga”, dzīsmis īroksta apstruode – Uģis Vilcāns (mix, LTG) i Nicsk Dawes (master, FR).

Grupys albumu „Reits”, kurs tyka izdūts magnetiskuos lentys formatā i kurymā vydā ir 10 dzīsmis, kotrs interesents digitalā variantā var dabuot bez moksys, nu pyrma tam juopadora grupys sagataveits aizdavums – juopīroksta iz T-krakla „Bez PVN” i karteņa juoatsyuta grupai iz e-postu bezpvn@inbox.lv. Nūsaklauseit albumu vysā garumā var ite https://soundcloud.com/bezpvn/sets/bezpvn-reits

Itūšaļt grupys sastuovā muzycej Kristaps Rasims (bolss, elektriskuo gitara, cyti instrumenti), Guntis Rasims (bolss, akustiskuo gitara), Jurs Vuāns (bolss, elektriskuo gitara, samplers, cyti instrumenti), Valdis Vucāns (bolss, basgitara), nu pi sytamajim instrumentim paleidz grupys „Momend” bundzinīks Normans Bārbals. Goda beiguos grupa svieteis desmit godu pastuoveišonys jubileju. Piec puora godu pauzis, „Bez PVN” atsuokuse ari koncertdarbeibu i cyta reize, kod jūs varēs redzēt iz skotuvis, byus 17. augusta vokors Varakļuonūs.

Vaira par grupu verīs http://bezpvn.lv

Sagataveja LaKuGa piec grupys „Bez PVN” informacejis
Karteņā grupa “Bez PVN”, foto Baiba Buceniece