Vasali 2012. goda pyrmajā dīna! Pasaverūt iz datumim, saīt, ka bejuse taida simboliska nedeļa – nu vīnim svātkim liedz ūtrim, nu vīna goda iz cytu.  Par nedeli LaKuGā publicāti 14 roksti par dažaidom latgalīšu kulturys i Latgolu saisteitom aktivitatem, pasuocīnim, nūtykumim.

.

Ūtrajūs Zīmyssvātkūs turpynuojom tradiceju ar Zīmyssvātku ailem i dīnu reitim. Īsokom paturēt pruotā, kab iz cytu godu zynuotu, kur latgaliskuos ailis i sveicīni atrūnomi!
Taipat ituos nedelis laikā beja prīca viesteit par dažaidim atbolvuojumim i titulim, kū sajāmuši dažaidi ar Latgolu ci latgalīšim saisteiti nūtykumi i ļauds – Latgolys planavuošonys regions pasnīdze atzineibys rokstu vīglatletei Inetai Radevičai par sasnīgumim sportā, par aizguojušuo goda skateituokū izruodi Latvejis profesionalajūs teatrūs klivuse „Latgola.lv”, bet Eiropys goda cylvāka Latvejā tituls daškierts arhiveiskupam Zbigņevam Stankevičam.
Nedelis laikā aicynuojom iz vairuokim pasuocīnim – Ontona Slišāna dzimšonys dīnā 28. decembrī tyka izdūta jauna juo gruomota ar nūsaukumu „Labi, ka labi”, Rēzeknis muzykalī jaunīši aicynuoja iz lobdareibys koncertu, bet Latgolys Kulturviesturis muzeja ir apsaverami dažaidi atspeidumi metalā RDMV audziekņu dorbu izstuodē. Turpynojūt Zīmyssvātku tradiceji, LaKuGa apkūpuoja i pīduovuoja pasuocīņu izlasi – kur i kai Latgolā pavadeit goda nūslāgumu i sagaideit Jaunū godi!
Jaunā godā suoksīs jauna saceņseiba par tīseibom puorstuovēt Latveju Starptautiskajā Eirovizejis dzīšmu konkursā. Itymā reizē Nacionaluos atlasis dalinīku puļceņā ir ari dzīsmineica Laura Bicāne, kurai paleidzēs grupys „Dabasu Durovys” zāni. Laurys konkursa dzīsmis klips – taišni Jiusu viereibai beja (ir) apsaveroms tepos LaKuGā.
Sovim skaiteituojim pīduovuojom caur fotoaparata objektivu pasavērt, kai guoja Raibuo Suņa gruomotys „Pyrma syltī” prezentacejis pasuocīnī Rēzeknē. Ka turpynoj ar gruomotom – Latgolys Kulturys centra izdevnīceiba ziņuoja par jaunū Marejis Andžānis aiļu gruomotu „Basām kājām…”.
Nedeļa naiztika ari bez tradicionalajom vierteibom – „Latgolys Vuords” nu Reigys radejis raidejums i īsavēršona janvara „Katõļu Dzeivis” numerā.
Ar itū nedeli nūsaslādz ari Vacais gods i decembra mieness. Par vysu decembri LaKuGā dalikti 84 jauni roksti par latgalīšū kulturys nūtykumim. Pošim prīca i prīca par tū, ka Latgolā ci cytur ir tik daudzi nūtykumu, par kurim raksteit latgaliski.

.
Itys gods LaKuGai bejs puormaiņu gods i Jaunajā ari paradzātys puormainis – kas vyss viņ iz lobu!

Kab i Jiusim ar taipat – viņ iz lobu i iz aušku! 😉