29. februarī 18:30 Daugpiļs teatrī pyrmizruodi pīdzeivuos vēļ vīna izruode latgaliski – „Rūžys byudu golūs”.

„Rūžys byudu golūs” ir popularuos rakstnīcys i dramaturgis Monikys Zeilis (Monika Zīle) speciali Daugpiļs teatrim saraksteita luga par latgalīšu dorbu, tykumu i dzeivisziņu. Lugu uzveds režisors Pīters Krilovs (Pēteris Krilovs), kurs Teatra bolvā „Spielmaņu nakts” 2010./2011. goda sezonā atzeits par Goda režisoru.

„Rūžys byudu golūs” ir stuosts par pīmīleigu latgalīšu kundzi lobuokajūs godūs, kura, īkūpdoma sātu i gataveidama pušdīnis, rozstuosta vysu sovu dzeivi, savejūt tū ar sovys tautys liktini, kulturu, volūdu i tradicejom. Izruodis laikā tuos varūne gataveis tradicionalūs sova nūvoda iedīņus.

Jaunīstudiejums ir monoizruode i golvonū lūmu itymā izruodē spēlēs Daugpiļs teatra aktrise ir Maija Korkliša. Izruodis muzykaluos partiturys autors – komponists byus Artūrs Uškāns.

Juoatzeimoj, ka 2012. godā Daupiļs teatrī itys nabyus vīneigais jaunīstudiejums latgaliski – planavuots latgaliski īstudēt ari Šekspira lugu “Sapyns vosorys naktī” (Sapnis vasaras naktī).

Karteņā: aktrise Maija Korkliša, Daugpiļs teatra arhivs