Dzejūļu autors: Normunds Bolužs

12. septembrī jau pīktū reizi nūtyka dzejis slams latgaliski “Rogovkys dzejis voga”, kurā pīsadaleja deveni autori. Dzejis saceņseibā uzvarēja Annele Slišāne, 2. vītā tyka Elizabete, bet 3. vītu ījēme Ņomuks (eistajā vuordā Normunds Bolužs). Itūgod portalā lakuga.lv ir vareiba puorskaiteit i ari nūsavērt video formatā (īrokstā nu pasuokuma) vysu treis laureatu dzejūļus. Normunds Bolužs papyldus treis slamā izskaniejušajim dzejūlim pīduovoj puorskaiteit ari vēļ divejus jaundorbus.

Rudiņa spektrys

Sistema mums lyka sasatikt školā
Sistema maņ lyka byut tovā orbitā
Sistema tev lyka muoceitīs iz desmit
I sistema lyka lopom krist, cyklā
Septembris īt kai kars, iz prīšku
Tovys soltuos rūkys apsastuoja iz vaiga
Tovus zūbus dora soltus kūšlene orbit
Tovys acs pīsaskuora munam ocu orbitam
I es radzu labi, uorsts sagrīze munys acs radzeni
Tu guoji man garom kai kars, kai pūsts
Muna sejis uztvere tevi atpazyna
Muns hipokamps tevi atceriejuos
Muna amigdala iz teve reagēja
Es aizpeļdeju, paps, Leiksnys azara plūsts
Tei beja sekunde, kai kristals, kai muļtikā
Tei beja sekunde, kai motocikla avareja
Tei beja sekunde, kai pyrmais moments, kod muotei īdeve bārnu
Tys beja kai oktobris, kas īt piec septembra
Tys beja kai zylī džinsi, kas īt piec kleitys
Tys beja kai breivais tiergs, kas īt piec Savīneibys
Tys beja kai plaščs, kas īt piec krakla
Tys beja kai klusums, kas īt piec “jā”
Bet koklā tak ryugts, jo vyss ir naizbāgams
Bet moks jau ir tukšs, i tys ir naizbāgams
I rūkys ir soltys, jo oktobrī plaukstuos plyust mozuok ašnis
I jiutys ir soltys, jo leidz sirdei plyust mozuok ašnis
I es varātu nūpierkt koka kolu, ka maņ vacuoki īdūtu vīnu eiro
Bet es iztierieju pādējū naudu iz konfektem haribo
Juos kryta nu automata, bet īstrāga pusceļā
Es krateju automatu, izkryta tikai zīmys cymds
Es siedieju aiz teve, es īdevu haribo
Tu smaideji skaista, tev suop zūbi nu haribo
Tev napatyka, ka tī nabeja duorguokī haribo
Tu nazynuoji, ka tī beja vīneigī haribo
I kai ryugts komuls koklā, ļūbesteiba īt kai zīma
I komulu kai zīmu baba nagaida
Ir tikai oktobris, bet solts ir kai zīmā
Bet malns plaščs ir tik skaistai
I kod atpazynu tevi, tys beja tik skaistai
Jā, rudiņs dreiž aizīt i aizīs, tys ir naizbāgamai
I mudruos mūdis fast fashion džinsus tu izsvīssi labdareibā
Bet tys beja tik skaistai, tū nasaīs izsvīst
I tys beja tik skaistai, tu beji naizbāgama

***

putnys karalaukā

my body is your oyster
there is no other object
that belongs to you so fully

my body is your oyster
there is no other dummy
that gave their body to you

šļakata! šļakata! šļakata!
zuoboki, zekis, slapnys
viejs, solts, oss, dur

tabletis, medika-tiuleņ-menti byus!

sasīs jī zuobokus
atguoduos lykumus
šļakata, šļakata, dāls

he is innocent
Он невиновен
es asu navaineigs

tramvajs, mežs, ilgs guojīņs
zalis lopys, zali cylvāki
pase, dokumenti, papeirs, registrys

pulss, augums, ausī pyutīņs
psihiatrs, smogs uorsta nūsapyutīņs

“Здесь всё плохо”

kas slikti?
jius poši zinit

rūka, piersts, datora pele
klikškis, rytynoj peleitis ritini zamuok
ritalins, terapeits, uorsta vizeite
selektivi serotonina atpakaļsaistis inhibitori
antidepresanti, šļakata, šļakata
uorsta nūruode

puiss ir navaineigs, jemit jū armejā
tys tak ir moderni
raksteit diplomdorbus iz stimulantim
tys tak ir moderni – uorstēt ļūbesteibu iz antidepresantim

You’re in the army now!

šļakata, šļakata
amerikys bryunajūs zuobokūs
skrīnu pa pūru

najiutu mīsu
munys kuojis ir atdūtys Latvejai
muna sirds ir atdūta tev

tys vyss, lai pasavārtu vēlreiz sīvītei acīs

Māksliniek! Klausies! Koncentrējies!
Fuck you! Tu esi tikpat liels vergs kā es!

Morāluos augstīnis
līk likt sevi augstuok par cytim

savu g36 automatu vari
ībuozt sev koklā

kod atīs krīvi — ceru, ka nabyusim vīnā īrokumā
maņ byus spāņu kauns viertīs tev acuos
kod viļksim tevi uorā i teišu tev turniketu

šļakata, šļakata
pasaver! pasaver! augšā ir ptička

jei lidoj! jei lidoj!
Kū tyvuok, tū eistuok
jū tyvuok, jū vaira
izsvīž nu depersonalizacejis

šauj! jis izjēme automatu
nūtiemēja, pīspīde gaili
bum!

vīns drons — pagolam
vīns miļjons teik ražuoti vēļ

es grybu redzēt serejis numuru putnam
kurs maņ byus liktineigs
es grybu dzierdēt pādejū vuordu
kurs myus byus liktineigs

es grybu redzēt sevi
ja es vysu dzeivē byutu izdarejs cytaižuok

es grybu redzēt, kuo
cēle piramidys

es grybu zynuot, kuo
beja pyrms BIG BANG

ja vīns nu myusu aizīs
apsūlom, ka pastuosteisim

Māksliniek!

***

bombačka

Saulainā vosorys dīnā maņ juobrauc da laukim
Vysu vosoru pavadeit pi datora nav ētiski
Babys saulainajā i skaistajā vyrtuvē ir vyssoldonuokuo čaja
Juos smaids i politnakorektī jūki ir eisti, jī atsasyt pret sīnu i kreit
Muns paps ar krysttāvu pasaruodeja īškā
Daugavā ir atrosts cytplanetīšu objekts

Mes braucam viertīs, kas tys par verki
Kapsulys formā, izvalkam krostā
120 kilogrami, bryuns i naideigs
Maņ juoprosa reddit
Taisu vaļā, nastruodoj saits
Mes rytynojam metala kapsulu augšā pa kolnu
Tik zaļa tei zuole, tik dzaltona pļava, tik skaista tei Latgola
Līkam īškā tymsi zylā volkswagen passat
Tys nabags nūsasād divdesmit centimetru
Spidometrā divdesmit kilometru
Muna baba ar Ernestu atskrīn i soka
A, ļauteni duorgī, kas tys par verki
Vedit jū prūjom, myus navajag juo
Es siežu pi krysttāva reddits suok struoduot
Es rokstu i postoju fotkys nu krosta
Jī nazyn, jī nazyn pēc laika kuods īmat

Zylu shemu ar boļtim uzrokstim viersā
Pyrmyo pasauļa kara jiurys mina
Lītuota Krīvejis Turku karā

Es izskrīnu uorā i ruodu i ruodu
Muns paps jau ir nūjiems vadenis nūst
Jis pasaver, apklust, pasaver soka
Ite bombačka
Muns telefons spruogst
Asmu žurnalists nu unilad, pastuostit myusim jiusu stuostu
asmu žurnalists nu global canada news, vai jius esit dzeivi
Asmu bumbu experts nu Amerikys SV
Vai izsaucet policeju, vai vēļ esit dzeivi?
Es postoju biļdi, ka maņ vyss okei
Hexagona spridzekļus izjiemu uorā
Salyku spaņūs zam fotačkys rokstu
Izjiemu uorā vysu kartošku, tik fantastiski beja
Muns telefons spruogst, jis palīk korsts
Sekunde sekundē maņ roksta i plaudej
Latvīši gon soka, ka mani
Sašņūrēs cīt par terorisma draudu
Es smejūs i soku, tak braucit maņ pakaļ
Kuods roksta, ka jebkurā momentā spruogs
Jebkurs mozuokais trīcīņs var aktivizēt jū
Mes braucam pa granta ceļu ar passat
Es pagrīžu golvu tī spani tik krotuos
Vīns saldiejuma kubiks var izsprydzynuot mašynu
Myus symtim tūs kubiku spaņūs krotuos
Es soku pap, apsastuoj lyudzu, jī krotuos jī spruogs
Muns paps ītīpeigs bet apstastuoja
Jis pagrīž golvu i soka maņ, dāls
Čill.
Ite amatols jam vajag detonatoru
Ar dzierksteli jis spruogs
Es tev īdūšu bisis šaušonys čaulus
Tū sissi pa patronu ar Fiskara vasari
Redziesi, ka nauzspruogs nu sitīņa
Vai ticēt vysam internetam
Vai ticēt savam tāvam
Logiski, ka juotyc ir tāvam
Mes braucam i braucam
Es sytu pa čaulu
Jei naspruogst i naspruogst
Muns tāvs zyna lobuok
Jī meklej i meklej
Munys biļdis ir netā
Jī grib īsaguoduot bumbu
Es soku, lai roksta maņ iz e-kasti
Počtovīkā roksta nu vuorda i uzvuorda
Es īsytu feisbukā – tei tak mentovka
Nā, draugi muni meilī
Tys naīs krostā
Es braucu da sātai,
Piļsātys cylvāks
Lai krysttāvs tū bumbu restaurej pats
Ar duorza šlangu jis teirej jū ilgi
Tikmer Vuocejā atrūn leidzeigu bumbu
Jī evakuej symts tyukstūš ļaužu
Kuods roksta, ka vajadzēja vīnkuorši saukt mani
Maņ internetā ir bad boy slava
Vysod gribieju dzeivuot kuo Bonny & Clyde

Pogostā vysi jau zyna par bumbu
Kaimiņu babuņs, kod dzēra jei čaju
Jei attaisa aizkarus reita rasā i īrauga objektu lelu i baisu
A ļauteni duorgī tei tak tei bomba
Jei zvona mentovkai
Jei atroda bombu
Muns kaimiņš jū laista i teirej ar šlangu
Tak braucit jai pakaļ, jei tiuleņ spruogs
Jī atbrauc ar sešim džipim i komandu
Muns paps soka par vālai
Mes jau jū demontiejom
Munam papam ir ūlys nu na jau nu dzeļža
Nu titāna dimanta jis soka jim tuo:
Ja es byutu zynovs, ka ite ir bomba
Es byutu jū veds — pareiz da Saeimai
Jūceni spūceni, jim tys napatyka
Jī pajēme bumbu tuos čaulys vairs nav
Lai gon cik troks tys stuosts
Tys beja vīnreizejs stuosts

***

spīdīņs

Ideologejis spīdīņs syt pa golvu
Smoguok kai smogais metals
Nacionalisma izpausme augstuokajā pakuopē
Ir apmaukuse zuobokus, nūdzynuse motus iz nulli i parunuojuse ar kapelānu
Jis zyna lobuok parkū juodadzynoj sveši bārni Gazā

Uzatic jam, dāls
Apsatiņ karūgā, konserv, īsatiņ kruosainā audaklā, vergs
Bolsoj par mani, svinēsim demokrateju, vergs
Tev juobyut lobam piļsūņam, apmeiz populistu
Lic sovai navaineigajai sirsneņai pukstēt par seju ar divdesmitprocenteigu atbolstu
I izdadzynoj sev iz kryutežys Eiropys Zvaigznis
Visu Latvijai! Klīdze vīns alkašs
Kaju Kallas jis ļūbeja vairuok nakuo savu biologiskū muoti
Vuocīšim nasanuoce īkaruot Krīveju
Bet Kajai Kallas nūteikti saīs
Jim nasaguoja atkrīviskuot Eiropu
Bet Liānai Langai nūteikti saīs

Ursula von der Leyen

Kotrys cīš sovā veidā
Es ruopoju prūm
Mani valk īškā ar ezoteriskim simbolim
Grupiejums, kuru finansej Kolomoiskis
Es ruopoju prūm nu kontradikcejom

Ideologejis nūspīdūšajam režymam asmu viezs, juoteik nu mane vaļā
Sabīdreibai juoatsabreivoj nu mane kuo nu pyvušys rūkys
Jis vīnmār pasaruod caur dēmonu apsāstom studentem
Kas tu esi?
Laiks Tev ari valnu satikt,
tev paradzāts nūvirzeit dūmys iz kuoda cyta varys īgrybu

Tev paradzāts uzturēt sistemu
I apsateit karūgā
Tys tak ir tik skaisti
Vēļ naesi gotovs paraksteit dereibu ar Luciferu?
Jam izlosi Trocki
Izlic iz sīnys plakatu
Bei vraga! Homo Sovieticus
Šauņ jam mugorā pret juo sīvu i bārnim
Tīši tuopat kuo Bolševiki šuove munam vactāvam

Nūjem nu sīnys plakatu
Bej Komunista!
Īsamuoc lītuot sirpi i āmuru, dāls
Tu nateirais anarhist,

Īļūbej poliamoreju
Kompartejis deja vu
Liberalismys tevi īvess naceļūs

Izzeimej sovai vibratoru kolekcejai pošai sovu karūgu
Nūsauc sevi par jaunuos paaudzis bruninīku
Zūbyna vītā zaļais monstrys 150 centrimetri
Apprec’ sovu desmitū partneri centralparkā plkst. 10 vokorā

Vari nūsist sovu trešū bārnu, golvonais apmeiz populistu i sasit komunistu, golvonais esi laimeigs, dāls

Tu vari skrīt, tu vari nūsaslēpt izolātā istabā
Bet tu navari aizbēgt, jī tiks pi teve caur lūgim i vodim, jī tiks pi teve caur rozešu caurumim
Sorkona izolenta iz lūgim napaleidzēs
Ekranā pasaruodeis lūgs “Do you want to see a ghost?”
I vīneiguos izvielis uz kurom klikškinuot byus “Yes” i “Yes”
Sasaraun embrionā
suka, izdzeivoj vysu dzeivis kruošņumu

Izdauz’ sev leluokus vaigu kaulus ar vasari
Bet sauc tū par looksmaxxing, fantastiskys saturs
Iz celim, bez biksem! Atguodoj kai tevi ar syksnu dauza bierneibā

Give it to me! Give it to me! Give it to me!

Mēs guojom pa snīguotom Daugovpiļs īlom
Mes vieremēs dabasūs glaznuotuos sīnuos
Mēs vieremēs acīs vīns ūtram i zynovom
Tei vīneiguo līta, kas eista, mes zynovom
Es redzieju, sajutu, izjutu, zynu

Es vierūs meitinis acīs, kod jai muote lidmašynā nūpierka smaržys Sol Janeiro 62
Es smaideju radzūt, kuo kuodam puikam Jēteburgys bazneicā sīvīte prīsters pījam kristeibys
Vysa taisneiba palyka tī i Daugovpiļs Rotko centrā
Vysa taisneiba palyka momentā, kod vactāvs aiz mugorys turēja suneiti i duovuoja mozdālam
Mes vieremēs dabasūs glaznuotuos sīnuos
Es redzieju, sajutu, izjutu, zynu

Munus vacvacuokus varēja pakļaut tikai caur jūs miersteigom atlīkom
Mani saīs pakļaut tikai caur munom miersteigom atlīkom
Munai babai varēja likt apēst ausekleiša pīspraudi
Bet jai nikod navarēja aizlīgt runuot latgaliski

Munu dzedu varēja īsaukt karā i syuteit leidz Berlīnei
Bet jam nikod navarēja īmuoceit nūsist

Mēs guojom pa snīguotom Daugovpiļs īlom
Mēs vieremēs dabasūs glaznuotuos sīnuos
Es redzieju, sajutu, izjutu,
zynu

***

Meitene no nākotnes

Viņa bija neaizmirstama
Viņas ēteriskā aura
Kombinācijā ar ADIDAS SAMBA
Wow! Tik gaisīgi

Es lasīju sēnes pie Ummas ezera
Es skaitīju gailenes savā eko koka grozā
Es cerēju, ka mēs skūpstīsimies mūsu nākotnes dārzā

Šeit — esmu pasargāts no visa toksiski maskulīnā
Vienīgais vīrietis šajā Carnikavas pagasta mežā esmu es
Un šeit nav lācis

Sāk tumst
Es laužu dimensijas
Es laikam apēdu nepareizo sēni
Neviens nav pasargāts no toksiska meskalīna

Jau ir satumsis
Visapkārt lido violeti kristāli
Tie mirdz tik gaiši, tie izgaismo visu mežu

Es skrienu, šļakstoņa, ēnu šņākoņa
Mani baltie doctor martens zābaki nu jau ir dubļaini
Man jāpaspēj, ēnas sauc mani dobā balsī, murgaini
Nē, un vēl man nesaprotamā mēlē, nē!

Es izķepurojos no purva
Aiz kokiem ir tik gaišs
Apstājas laiks, tā mirdzoņa velk mani sevī
Tā velk… un velk
*
Tā izdzveš siltumu
Esmu ticis pāri visiem kokiem
Tas ir pēdejais koks
Uz zemes ir tik balts kristāls un tam blakus…
Ak DIEVS! Tur ir meitene
Viņa ir tik bāla
un… tik skaista

-Vasals, ka namaloj!
-Kādā valodā Tu runā?
-latvīšu
-Okay, whatever, mums jāskrien!

Viņa izvelk zobenu, kas izgaismo visu perimetru
Ar vienu lēcienu un sitienu pa zemi latgaliešu princese padzen ēnas ar dārdoņu
Viņa nāk man tuvāk un sniedz man blašķi
-Jem, duorgais draugs, ite šmakovka nu Daugavpiļs šmakovkys muzeja
-Kas par sūdu!?
-Dzer, dzer, īsastyprynoj, tev nūderēs!

Es iedzēru šmakovku un mani pārņēma Latgales maģija
Manas acis izpletās, mans IQ pacēlās
Mans pulss… arī… pacēlās

Mēs skrienam, lidojam, nogalinām mošķus, tāds kaifs
Stop!
A kā tevi sauc?
-Marta Dzeisla
-Jā, jā, un es esmu Inokentijs Mārpls
Vai varbūt Breds Pits no Trojas
-Haha, gribi tic, gribi natic
I vyspuor Pits Trojā labi izavēre

Ahh… un kādi ceļi tevi šeit sūtījuši?
-Kod maņ praseja kū es izavālātu satikt mežā: luoci vai veirīti es izavelieju veirīti
-Tu esi pareizajā vietā! Bet tagad nopietni, lūdzu
-Es asmu nu nuokūtnis, myusim paradzāts trešais pasauļa kars
Es asmu tava sorkonuo tablete, Tu esi Neo, Tovuos rūkuos ir Latvejis i Eiropys nuokūtne, tuos ir tovys pamatapmuoceibys, tu vessi karaspāku pret orku ordu
-???
-Jā, puis, tys gon, tu dūmoj, ka puorsokā tyki?
-Nē, nē, nē. Tas ir tieši tas, ko es meklēju

Viņa no mugursomas izvilka mazu rokturi
Ar nelielu aizturi tas prožektējās par smaragda zaļās krāsas zobenu
-Orkulauzs 2000, kontūzija 100 KM radiusā, programmāts iz īnaidnīku, tiuleiteja neirodegeneraceja, tys byus tovs primarais īrūcs
-Wow!
-Pagaid, puis! Turi itū
Viņa man iedeva melnu binokli ar sarkanu lēcu
-Dīvaredze 2.0, ar jū redziesi caur vysim mežim, orki byus sorkonā kruosā
Jam, itys tovs pādejais īrūcs
Vēl viens rokturis, kas pārtop par snaiperi
-Lāzerefekts 2030, caurdur jebkuru objektu, tīšs truopejums – fatāli mīsys būjuojumi, orki var slieptīs – bet jī nikod naaizbēgs
Ahh, romanchikku!

Tas ir tieši tas, kas man vajadzīgs
Esmu bezgala pateicīgs Martai, manas kabatas ir pilnas ar rīkiem, sāk palikt gaišāks
Latgaliešu meitene mani ņem aiz rokas un ved uz Lilastes pludmali
Pa ceļam mēs izmēģinam ieročus, mums ir tik jautri
Nē! Martas matos ieķēries zirneklis
Viņa ir bezbailīga, izņemot zirnekļus
es to ātri norāvu un izlikos, ka nekas nav noticis
Ak, Dievs, esmu iemīlējies, tā ir mīlestība pēc pirmā nogalinātā monstra

Viņa smaida, viņas bēšais kombinzons, viņas aura, viņas ADIDAS krosenes
Mēs saguruši, gara pastaiga gar pludmali, gara saruna par nākotni

Es krītu uz ceļiem
-Marta, vai Tu kļūsi mana sieva?
Viņa pazūd kā lāse aiz loga
Palika tikai viņas smaržas
Meitene pazuda.
Izgaisa.

---

Publikaceja sagataveita ar Vaļsts kulturkapitala fonda atbolstu.