Ministru prezidente Laimdūta Straujuma izdavuse reikuojumu par dorba grupys izveidi Latgolys kongresa symtgadis pasuokumu organiziešonai.

Dorba grupai būs juoizstruodoj Latgolys kongresa symtgadis pasuokumu plans i juokoordinej tuo eistynuošona. Plans i finansiejuma tāme dorba grupai juoizstruodoj da ituo goda 1. novembra. Finansiejuma tāmē byus juonūruoda pasuokuma eistynuotuojs i finansiejuma olūts. Taipat ekspertim byus juosekoj leidza finansiejuma izlītuošonai.

Ar Straujumys reikuojumu par dorba grupys vadeituoju īcalta kulturys ministre Dace Melbārde. Dorba grupys lūcekli byus vidis aizsardzeibys i regionaluos atteisteibys ministrs Kaspars Gerhards, Rēzeknis mers Aleksandrs Bartaševičs, Bolvu nūvoda dūmis prīšksādātuojs Andris Kazinovskis, Latgolys viestnīceibys GORS vadeituoja Diāna Zirneņa. Taipat dorba grupā īsaisteiti dažaidi pošvaļdeibu īstuožu i navalstiskūs organizaceju puorstuovi nu Latgolys regiona. Ar pylnu dorba grupys dalinīku sarokstu var īsapazeit L. Straujumys izdūtajā reikuojumā.

Vīns nu nūzeimeiguokajim Latvejis vaļsts dybynuošonys aizsuokumim ir Latgolys kongress 1917. godā. Tuo laikā pyrms 100 godim Rēzeknē nūtyka pyrmuo demokratiski īvālātu Latgolys latvīšu puorstuovju sanuoksme, kurā tyka nūlamts, ka Latgolys, Vidzemis i Kurzemis latvīši ir vīna tauta i Latgolai juoapsavīnoj ar puorejim tūpūšuos Latvejis vaļsts nūvodim vīnā zemē. Latgolys kongresa symtgadis reikuošona īsazeimej kai vīna nu byutiskuokajom nūtikšonom Latvejis symtgadis atzeimiešonys programā, informej Kulturys ministreja.