Ar Storptautyskū teatra festivalu “Telpa – Daugavpils” nūsaslēdze ari 2015./2016. goda sezona Daugovpiļs teatrī, kas napuorprūtami deve jaunus puorbaudejumus i izaicynuojumus, nu reizē ari padareja teatra kolektivu cīšuoku i stypruoku, informej teatra puorstuove Janīna Ivanova.

Sezonys laikā tyka īstudātys 7 izruodis, kurūs vydā beja i komedejis, i kriminaldrama, i klasika, i avangards. Sezona tyka atkluota oktobrī ar šokejūšu komedeju latgaliski “Latgaliešu rulete” (rež. O. Šapošnikovs), sovukuort novembrī pyrmizruodi pīdzeivuoja muzykala puosoka pīaugušajim “Mistera Ikss noslēpums” (rež. O. Šapošnikovs), kas veiduota piec Imris Kalmana operetis “Cirka princese” motivu. Sezonys ūtruo puse tyka suokta ar psihologisku kriminaldramu “Bīstamais pagrieziens” (rež. O. Šapošnikovs). Sovukuort jau martā tyka īstudāta dejis izruode “Parunāsim?” (idejis aut. i horeogr. I. Saveļjeva), kas beja pyrmuo dejis izruode teatra eksperimentalajā zalā. Juoatzeimoj, ka par itū īstudiejumu Irina Saveļjeva ir nomināta “Spēlmaņu nakts” bolvai kai Goda kusteibu muokslinīks. Tyvojūtīs sezonys nūslāgumam, Daugovpiļs teatrī atsagrīze jaunuos i talanteiguos režisoris Paula Pļavniece i Lucina Sosnovska (Pūleja), kab īstudātu pasauļa klasikys dorbus myusdīneigā redzīnī. Rezultatā teatra repertuaru papyldynuoja izruode “Šinelis un Šinelis” (rež. P. Pļavniece) piec Nikolaja Gogoļa stuosta motivu i myusdīneigs Viljama Šekspīra “Hamlets” (rež. L. Sosnovska). Sezonys pādejuo pyrmizruode S. Paruļska komedejai “Divi smiltājā” (rež. O. Šapošnikovs) tyka veļteita lauluotim puorim i mīlesteibai, kas iztur vysu.

Vysys sezonys garumā Daugovpiļs teatris pīduovuoja sovys izruodis na tik Daugovpilī, braucūt gostūs iz Boltkrīveju, Ventspili, Līpuoju, Valmīru, Jelgovu i cytur. Kluot vēļ itūgod tyka turpynuota 2013. godā suoktuo tradiceja – Daugovpiļs teatra dīnys Reigā. Majā Latvejis Nacionalajā teatrī i M. Čehova Reigys Krīvu teatrī varēja apsavērt 4 Daugovpiļs teatra izruodis latvīšu, krīvu i latgalīšu volūdā.

Kai jau tyka pīmynāts īprīkš, Daugovpiļs teatra sezonu nūslēdze Storptautyskais teatra festivals “Telpa – Daugavpils”, kurymā itūgod pīsadaleja jaunī teatra muokslinīki nu Latvejis, Lītovys, Krīvejis, Boltkrīvejis, Spānejis i Norvegejis.

Juoatzeimoj, ka itūvosor Daugovpiļs Dizaina i muokslys vydsškolys “Saules skola” izgleiteibys programys “Teātra māksla” audziekni aizstuovēs sovus diplomdorbus, i daļa nu jūs papyldynuos Daugovpiļs teatra akteru trupu.

Jau itūšaļt teatris viestej, ka nuokušajā sezonā tys turpynuos puorsteigt ar tikpat daudzveideigim īstudiejumim. Darbeibu Daugovpiļs teatrī turpynuos jaunais režisors Georgijs Surkovs, īstudejūt Aleksandra Volodina lugu “Pieci vakari”. Taipat gaidoma pyrmizruode īstudiejumam “Kailais karalis” (rež. O. Šapošnikovs), kurū var nūsaukt par muzykalu puosoku pīaugušajim. Kluot vēļ teik planavuots īstudēt ari izruodi bārnim, kuruos režisors byus Māris Korsiets. Rudinī Daugovpiļs teatrī gasteis režisors Dž. Dž. Džilindžers, īstudejūt izruodi latvīšu volūdā. Sovukuort vīna nu nūzeimeiguokajom nuokušuos sezonys nūtikšonom byus Latgolys kongresa symtgadei veļteitais F. Trasuna lugys “Nūgrymušuo piļs” īstudiejums.

Karteņa: Džeina Saulīte